Polsha aprel yoki mayda Rossiya ko‘miridan butunlay voz kechishni rejalashtirmoqda

Polsha hukumati aprel yoki may oylarida Rossiya ko‘miridan butunlay voz kechishni rejalashtirmoqda. Bu haqda 30-mart kungi matbuot anjumanida Polsha bosh vaziri Mateush Moravetskiy ma’lum qildi.

“Vazirlar Kengashida biz Rossiya ko‘miridan voz kechish rejasini qabul qildik”, — dedi bosh vazir hamda Varshava buni Yevropa Ittifoqining umumiy roziligisiz amalga oshirayotganini ta’kidladi. “Biz buni u yerda (Yevroittifoqda) mavjud qoidalarga zid ravishda qilyapmiz”, — dedi Moravetskiy.

Endilikda reja parlament tomonidan tasdiqlanishi va prezident tomonidan imzolanishi kerak. “Aprel, eng kechi, may oyida Rossiya ko‘miridan butunlay voz kechish vaqti keladi”, — dedi bosh vazir. Shuningdek, u 2022-yil oxirigacha Rossiya neftidan ham butunlay voz kechish rejalashtirilayotganini aytdi.

Polsha hukumati Avstraliya, Janubiy Afrika yoki Kolumbiyadan ko‘mir import qilish qimmatroqqa tushmaydi, deb hisoblamoqda. “Biz ushbu qaror polshaliklarning hamyoniga zarar qilmasligi, ular avvalgidan qimmatroq to‘lamasligi uchun hamma narsani qilamiz”, — deya ishontirdi bosh vazir.

Respublikaning iqlim va atrof-muhitni muhofaza qilish vaziri Anna Moskva respublikaga 8 million tonna ko‘mir kerakligini ta’kidladi. “Biz yetkazib berishni qayerda va qanday tashkil qilishni bilamiz”, — deb ishontirdi u.

Germaniya ham kuzga borib Rossiya ko‘miridan, 2022-yil oxirida esa Rossiya neftidan mustaqil bo‘lishni maqsad qilgan. Mart o‘rtalarida Germaniya Qatar bilan gaz bo‘yicha uzoq muddatli hamkorlik to‘g‘risida kelishib olgani haqida xabar qilindi.