Rossiya 2028 yoki 2032-yilgi Yevropa chempionatini o‘zida qabul qilmoqchi va bu borada UEFAga ariza topshirdi.
Tashkilot Rossiyaning 2028 yoki 2032-yilgi Yevropa chempionatini o‘tkazishga qiziqayotganini tasdiqladi.
Yevro—2028 mezbonligi uchun Buyuk Britaniya va Irlandiya birgalikda ariza topshirgan edi. Italiya Yevro—2032 mezbonligi uchun da’vogarlik qilmoqda. Rossiya va Turkiya esa 2028 yoki 2032-yilgi Yevropa chempionatining mezbonligini qo‘lga kiritish istagida.
The Telegraph xabariga ko‘ra, UEFA rahbariyati Rossiyaning Yevro—2028 ga mezbonlik qilish taklifini rad etishga urinib ko‘rish uchun shoshilinch yig‘ilish o‘tkazadi. Tashkilot Rossiyaning ushbu taklifini birinchi bosqichda rad eta olmasligini tushunmoqda. Qayd etilishicha, hozirgi siyosiy notinch vaziyatda Rossiyada xalqaro musobaqalar o‘tkazishni “tasavvur qilib bo‘lmaydi”.
Yevro—2028 va Yevro—2032 musobaqalari mezbonligi uchun ariza topshirish muddati 12-aprelga qadar uzaytirilgan. Avvaliga bu muddat 23-martgacha qilib belgilangandi. Turnirlar qaysi davlatlarda o‘tkazilishi haqidagi qaror 2023-yil sentabr oyida qabul qilinadi.
Ma’lumot uchun UEFA 2028-yildan Yevropa Chempionati ishtirokchilari sonini 32 taga yetkazmoqchi.
Bungacha Xalqaro boks assotsiatsiyasi (IBA) rossiyalik va belarusliklar bokschilarga xalqaro musobaqalarda qatnashishni taqiqlagandi, Butunjahon boks tashkiloti (WBO), Xalqaro boks federatsiyasi (IBF), Butunjahon boks kengashi (WBC), Butunjahon boks assotsiatsiyasi (WBA) Ukrainadagi vaziyat tufayli Rossiyadagi janglarni tan olmasligini ma’lum qilgandi. FIFA Rossiya futbol terma jamoasini JCh—2022 o‘tish o‘yinlaridan, UEFA esa rus klublarini Yevrokuboklardan chetlatgan edi.
Izoh (0)