Россия 2028 ёки 2032 йилги Европа чемпионатини ўзида қабул қилмоқчи ва бу борада УЕФАга ариза топширди.
Ташкилот Россиянинг 2028 ёки 2032 йилги Европа чемпионатини ўтказишга қизиқаётганини тасдиқлади.
Евро—2028 мезбонлиги учун Буюк Британия ва Ирландия биргаликда ариза топширган эди. Италия Евро—2032 мезбонлиги учун даъвогарлик қилмоқда. Россия ва Туркия эса 2028 ёки 2032 йилги Европа чемпионатининг мезбонлигини қўлга киритиш истагида.
The Telegraph хабарига кўра, УЕФА раҳбарияти Россиянинг Евро—2028 га мезбонлик қилиш таклифини рад этишга уриниб кўриш учун шошилинч йиғилиш ўтказади. Ташкилот Россиянинг ушбу таклифини биринчи босқичда рад эта олмаслигини тушунмоқда. Қайд этилишича, ҳозирги сиёсий нотинч вазиятда Россияда халқаро мусобақалар ўтказишни «тасаввур қилиб бўлмайди».
Евро—2028 ва Евро—2032 мусобақалари мезбонлиги учун ариза топшириш муддати 12 апрелга қадар узайтирилган. Аввалига бу муддат 23 мартгача қилиб белгиланганди. Турнирлар қайси давлатларда ўтказилиши ҳақидаги қарор 2023 йил сентябрь ойида қабул қилинади.
Маълумот учун УЕФА 2028 йилдан Европа Чемпионати иштирокчилари сонини 32 тага етказмоқчи.
Бунгача Халқаро бокс ассоциацияси (IBА) россиялик ва беларусликлар боксчиларга халқаро мусобақаларда қатнашишни тақиқлаганди, Бутунжаҳон бокс ташкилоти (WBO), Халқаро бокс федерацияси (IBF), Бутунжаҳон бокс кенгаши (WBC), Бутунжаҳон бокс ассоциацияси (WBA) Украинадаги вазият туфайли Россиядаги жангларни тан олмаслигини маълум қилганди. ФИФА Россия футбол терма жамоасини ЖЧ—2022 ўтиш ўйинларидан, УЕФА эса рус клубларини Еврокубоклардан четлатган эди.
Изоҳ (0)