“Yuventus” “Liverpul” vingeri Muhammad Salohni o‘z safiga qo‘shib olish imkoniyatlarini o‘rganmoqda.
29 yoshli yarim himoyachining mersisaydliklar klubi bilan shartnomasi 2023-yilda yakuniga yetadi. Hozircha tomonlar kelishuvni uzaytirish borasida kelisha olishmayapti, misrlik futbolchi taklif qilingan shartlardan qoniqmayapti.
La Gazzetta dello Sport’ning yozishicha, Turin klubi yuqori darajali futbolchi bilan shartnoma imzolashga tayyor va Saloh asosiy variantlardan biri bo‘lib turibdi.
Shuningdek, “Yuventus” futbolchining moliyaviy ehtiyojlarini qondirishi mumkinligi ham qo‘shimcha qilinmoqda.
Saloh Italiya chempionatida o‘ynash tajribasiga ega. U 2014/15-yilgi mavsumda “Fiorentina”, 2015—2017-yillarda esa “Roma” sharafini himoya qilgan.
Avvalroq Muhammad Salohga “Barselona” qiziqish bildirayotgani haqida xabar qilingandi. Ammo La Liga jamoalariga o‘tish futbolchining rejalarida yo‘qligi aytildi.
Muhammad Angliya Premyer Ligasining 27 o‘yinida maydonga tushib, 20 ta gol va 10 ta golli uzatmaga mualliflik qildi.
Izoh (0)