“Yangi jahon urushi boshlanib bo‘ldi” — Venesuela prezidenti

Venesuela prezidenti Nikolas Madura yangi jahon urushi boshlangani va u iqtisodiy xarakterga ega ekanini ma’lum qildi, deb xabar beradi TeleSUR telekanali.

“U xomashyo, oziq-ovqat va energiya yetkazib berishda beqarorlikni keltirib chiqarish orqali butun mamlakat va mintaqalarni bo‘g‘ib qo‘yishni maqsad qilgan”, — deydi u.

Maduroning fikricha, ushbu urush iqtisodiy bosqichdan yadro qurolidan foydalanish xavfi bo‘lgan haqiqiy qurolli qarama-qarshilikka aylanib ketishi mumkin.

“Men avval boshidan Ukraina Rossiyaga qaratilgan ommaviy qirg‘in quroliga ega bo‘lishi mumkinligini inkor etmaganlardan biri edim. Dunyoda haqiqiy yadro urushi xavfi mavjud. Venesuela jahon hamjamiyatini hushyor bo‘lishga chaqiradi”, — deydi davlat rahbari.

Avvalroq Venesuela Rossiya prezidenti Vladimir Putinning Donbassda tinchlikni himoya qilishga qaratilgan chora-tadbirlarini to‘liq qo‘llab-quvvatlashini bildirgandi. “Venesuela Rossiyada tinchlikni saqlash, o‘z xalqi va vatanini jasorat bilan himoya qilishda prezident Vladimir Putinni to‘liq qo‘llab-quvvatlashini ma’lum qiladi”, — degan Maduro.

U, shuningdek, Rossiya va uning rahbariga qarshi global manipulyatsiya kampaniyalarini mag‘lub qilishga chaqirgandi. “O‘zimizni ming marta takrorlangan yolg‘onga aldanib qolishimizga yo‘l qo‘ymaymiz. Putin tinchlik huquqi va o‘z xalqining qadr-qimmatini himoya qilishini yaxshi bilamiz”, — deya qo‘shimcha qilgan Venesuela prezidenti.