Firibgar aslida mavjud bo‘lmagan “dacha” uchun eʼlon berib, u yerda dam olish istagidagi odamlardan oldindan pul undirgan. Keyin aloqani uzib, g‘oyib bo‘lavergan.
Joriy yil 22-iyun kuni Toshkent shahar IIBBga 65 yoshli fuqaro ariza bilan murojaat qilgan. Shikoyatida “dacha” ijaraga olish uchun begona shaxs kartasiga oldindan 1,4 million so‘m o‘tkazib berganini aytgan. Pulni olgan “shovvoz” aloqani uzib, g‘oyib bo‘lganini bildirgan.
Murojaatdan so‘ng, firibgar ichki ishlar xodimlari tomonidan hibsga olindi.
“O‘tkazilgan tezkor tadbir davomida 1999-yilda tug‘ilgan fuqaro Toshkent shahri hududida qo‘lga olindi. Surishtiruvlar natijasida u shu kabi 15 dan ortiq holatlarni sodir etgani maʼlum bo‘ldi”, deyiladi manba xabarida.
Hozirda holat yuzasidan Jinoyat kodeksining 168-moddasi 4-qismi bilan jinoyat ishi qo‘zg‘atilgan. Gumonlanuvchi protsessual tartibda ushlangan. Tergov harakatlari davom ettirilmoqda.
Ichki ishlar xodimlari aholini shu kabi holatlardan ogohlikka chaqirgan. Maʼlum qilinishicha, begona shaxslarga tegishli “dacha”lar rasmlarini internetga joylab, dam olish uchun arzon narx taklif qilayotgan firibgarlar ko‘paygan. Soxta reklamaga ishongan odamlar pulni oldindan to‘lab, aldanib qolmoqda.
Izoh (0)