Ukraina prezidenti Vladimir Zelenskiy mamlakatdagi harbiy holat davrida barcha aholiga quroldan foydalanish imkonini beruvchi qonunni imzoladi. Bu boradagi tegishli hujjat Oliy Rada saytiga joylashtirilgan.
Ta’kidlanishicha, gap ov, sport va harbiy xizmatchilarga sovg‘a qilingan qurollar haqida ketmoqda. Bunda, fuqarolar “Ukrainaga qarshi qurolli tajovuzni amalga oshirayotgan shaxslar”ga qarshi qurol qo‘llagani uchun javobgarlikka tortilmaydi.
“Harbiy holat davrida Ukraina fuqarolari o‘zlariga sovg‘a qilingan qurollar, sport qurollari (pistoletlar, revolver, miltiqlar), ov qurollari, silliq stvolli yoki qo‘shmiltiqlarda, shuningdek, ularga mo‘ljallangan o‘q-dorilardan foydalangan holda qarshilik ko‘rsatishlari mumkin”, — deyiladi hujjatda.
Mazkur qonun kuchga kirgan va butun harbiy holat davrida amal qiladi.
Tengrinews nashrining yozishicha, ushbu qonun qabul qilinishidan oldin Ukrainada aholiga jangovar qurollarni tarqatish bo‘yicha qaror qabul qilingan. Bu Ukraina hukumati tomonidan nazorat qilinadigan shaharlar ko‘chalarida o‘zboshimchalik to‘lqinini keltirib chiqargan.
Eslatib o‘tamiz, 25-fevral kuni Zelenskiy umumiy safarbarlik to‘g‘risidagi farmonni ham imzolagandi. Hujjat Ukraina prezidentining rasmiy saytida e’lon qilingan. Safarbarlik Rossiyaning harbiy aralashuvi bilan asoslanadi. Farmon kuchga kirgan kundan boshlab 90 kun ichida uni Ukrainaning barcha hududlarida qo‘llash topshirilgan.
Rossiya—Ukraina urushiga oid tezkor, ishonchli yangiliklar va ma’lumotlarni Daryo’ning live sahifasi orqali kuzatib boring → @Daryo_Live
Izoh (0)