Rossiya tashqi ishlar vaziri Sergey Lavrov Moskvada Qirg‘iziston TIV rahbari Ruslan Kazakbayev bilan muzokaralar o‘tkazdi. Kazakbayev Qirg‘izistonning Moskva hamda Kiyev o‘rtasida Ukrainadagi urush tufayli olib borilayotgan muzokaralar uchun maydon hozirlashga tayyorligini ma’lum qilgan. Bu haqda “Kommersant” xabar berdi.
Qirg‘ziston tashqi ishlar vaziri mamlakatning ikki davlat o‘rtasidagi muzokaralarda kelishuv amalga oshib, tinchlik o‘rnatilishi uchun har qanday vositachilik choralariga tayyorligini qayd etgan.
“Zarurat paydo bo‘lganda tinchlik hamda o‘zaro hamkorlik o‘rnatilishida muzokaralar uchun maydon tayyorlashga va kerakli choralarni ko‘rishga tayyormiz”, — deya birinchi Qorabog‘ urushi vaqtida aynan Qirg‘izistonda tinchlik muzokaralari bo‘lib o‘tganini eslatgan Kazakbayev.
24-fevralda Vladimir Putin Ukrainada harbiy operatsiyalar boshlaganini e’lon qilgan. Urushga barham berish yuzasidan birinchi Rossiya–Ukraina muzokaralari 28-fevral kuni Belarusda bo‘lib o‘tgan. Ikkinchi raund ham 3-mart kuni Belarusda o‘tkazildi. Uchinchi raund 5 yoki 6-martda bo‘lib o‘tishi taxmin qilinmoqda. Turkiya, Vengriya, Ozarbayjon hamda Isroil kabi mamlakatlar ham Rossiya—Ukraina muzokaralari uchun maydon berishga, bu borada vositachilik qilishga tayyorligini bildirgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)