NATO Ukrainadagi havo yo‘lini yopmaydi. Mamlakatda parvozsiz hudud haqidagi petitsiyani bir million foydalanuvchi imzolagan

NATO Ukraina osmonidagi havo yo‘lini yopmaydi. Bu haqda alyans bosh kotibi Yens Stoltenberg ma’lum qildi, deya xabar bergan Reuters.

Uning so‘zlariga ko‘ra, Ukraina osmonida parvozsiz hudud tartibini belgilash NATO kuchlari tomonidan Rossiya samolyotlarining urib tushirilishini anglatgan va harbiy nizo yanada murakkablashgan bo‘lardi.

“Ittifoqchilar NATO uchoqlarining Ukraina havo yo‘lida uchmasligini ta’minlash tarafdori, ular alyans qo‘shinlarining Ukraina hududiga kirishiga ham qarshi”, — deya qayd etgan Stoltenberg.

“Ukrainaning alamzada ekanligini tushunamiz, lekin mamlakat osmonida parvozsiz hudud tashkil qilinishi Yevropada keng miqyosli katta urush boshlanishiga olib kelishi mumkin. Unda ko‘plab mamlakatlar ishtirok etadi va ushbu urushning oqibati, ziyoni ham juda katta bo‘lardi”, — deya qo‘shimcha qilgan NATO bosh kotibi.

24-fevralda Rossiya qo‘shinlari Ukrainada maxsus harbiy operatsiyalarni boshladi, Ukraina shu kunning o‘zida fuqarolik aviatsiyasi samolyotlari uchun havo yo‘llari yopilganini e’lon qildi.

NATO kuchlari tomonidan Ukraina havo yo‘llarida parvozsiz hududning tashkil qilinishi alyansning havodan zarbaga qarshi kurashish qurollarini Rossiyaning havodan hujumlariga qarshi ishlatilishini anglatadi. Ma’lumotlarga ko‘ra, Ukrainaga bo‘layotgan hujumlarning asosiy qismi masofadan turib yo‘llanmoqda ya’ni havo hujumlaridan iborat.

Ukraina hukumati NATO’dan bir necha marta parvozsiz hududni tashkil qilishda yordam so‘ragan.

“Gaplarim sizga yetib borishi uchun yana qancha odam portlab ketishi, qo‘llar, oyoqlar, kallalar har yoqqa uchishi kerak? Ayting, yana qancha qurbon kerak? Men borib sanab chiqaman va siz aytgan raqam paydo bo‘lishini kutamiz”, — degan Ukraina prezidenti Vladimir Zelenskiy alyans vakillariga qilgan murojaatida.

Yevropaning Open Petition saytiga 26-fevralda Ukraina xalqining NATOga a’zo davlatlardan mamlakatning havo yo‘llarini to‘liq yopishni va Ukrainaga tinchlikparvar qo‘shinlarni kiritishni so‘rab petitsiya joylashtirilgan. Ushbu petitsiyani milliondan ziyod foydalanuvchi ma’qullagan.

Bir necha kun avval Oq uy Ukrainada parvozsiz hudud tashkil qilish unchalik yaxshi g‘oya emasligini bildirgan va bunda AQSh Rossiya bilan to‘g‘ridan to‘g‘ri nizoga borib qolishi mumkinligini qayd etgandi.