5-mart kuni KXDR Yapon dengizi tomon ballistik raketa uchirdi. Bu haqda Janubiy Koreya harbiylariga tayanib, “Interfaks” xabar berdi.
Janubiy Koreya Qurolli kuchlari Birlashgan shtab boshliqlari qo‘mitasining (JSC) ma’lum qilishicha, raketa mahalliy vaqt bilan soat 08:48 da Pxenyandagi Sunan tumanidan uchirilgan.
“Ayni vaqtda harbiylarimiz qo‘shimcha raketa uchirilishi ehtimoli borligi uchun Shimoliy Koreya harakatlarini kuzatmoqda va shaylik pozitsiyasini egallagan”, — deyiladi JSC xabarida.
2022-yil boshidan buyon bu KXDRning to‘qqizinchi marotaba raketa uchirishi hisoblanadi.
27-fevral kuni Janubiy Koreya Qurolli kuchlari KXDR Yapon dengizi tomon ballistik raketa uchirganini ma’lum qilgandi. Keyinroq Shimoliy Koreya “razvedka sun’iy yo‘ldoshi”ni yaratish uchun “muhim sinov” o‘tkazganini bildirgan.
Shimoliy Koreya yanvar oyining o‘zida yetti marta raketa sinovini amalga oshirgan, jumladan, gipertovushli va o‘rta masofaga mo‘ljallangan ballistik raketalarni uchirgan.
Yanvar oyida AQSh Shimoliy Koreya raketalarini uchirish chastotasi ortib borayotgani sababli Birlashgan Millatlar Tashkiloti orqali yangi sanksiyalar joriy etishni taklif qilgandi, chunki har bir uchirish Xavfsizlik Kengashi rezolyutsiyalarini buzadi. Bunday sanksiyalar birinchi marta 2006-yilda kiritilgan. Ular Shimoliy Koreyaga raketalar, materiallar va ularni ishlab chiqarish uchun zarur texnologiyalarni olib kirish va olib chiqishni taqiqlashni nazarda tutgan. Keyinchalik chora-tadbirlar kompleksi kengaytirilgan.
Izoh (0)