Россия ташқи ишлар вазири Сергей Лавров Москвада Қирғизистон ТИВ раҳбари Руслан Казакбаев билан музокаралар ўтказди. Казакбаев Қирғизистоннинг Москва ҳамда Киев ўртасида Украинадаги уруш туфайли олиб борилаётган музокаралар учун майдон ҳозирлашга тайёрлигини маълум қилган. Бу ҳақда «Коммерсантъ» хабар берди.
Қирғзистон ташқи ишлар вазири мамлакатнинг икки давлат ўртасидаги музокараларда келишув амалга ошиб, тинчлик ўрнатилиши учун ҳар қандай воситачилик чораларига тайёрлигини қайд этган.
«Зарурат пайдо бўлганда тинчлик ҳамда ўзаро ҳамкорлик ўрнатилишида музокаралар учун майдон тайёрлашга ва керакли чораларни кўришга тайёрмиз», — дея биринчи Қорабоғ уруши вақтида айнан Қирғизистонда тинчлик музокаралари бўлиб ўтганини эслатган Казакбаев.
24 февралда Владимир Путин Украинада ҳарбий операциялар бошлаганини эълон қилган. Урушга барҳам бериш юзасидан биринчи Россия–Украина музокаралари 28 февраль куни Беларусда бўлиб ўтган. Иккинчи раунд ҳам 3 март куни Беларусда ўтказилди. Учинчи раунд 5 ёки 6 мартда бўлиб ўтиши тахмин қилинмоқда. Туркия, Венгрия, Озарбайжон ҳамда Исроил каби мамлакатлар ҳам Россия—Украина музокаралари учун майдон беришга, бу борада воситачилик қилишга тайёрлигини билдирган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)