Ukraina Mudofaa vazirligining Razvedka bosh boshqarmasi Rossiya maxsus xizmatlari Donetskdagi bir qator ijtimoiy infratuzilma obyektlarini minalashtirganini ma’lum qildi, deb xabar beradi “Kommersant”.
Kiyevning hisoblashicha, bu Ukrainani teraktlarda ayblash uchun kerak. Ukraina Mudofaa va milliy xavfsizlik kengashi kotibi Aleksey Danilov DXR va LXR aholisini evakuatsiya qilayotgan avtobuslar portlatishi mumkinligini taxmin qilmoqda.
“Ukraina harbiy razvedkasi Rossiya maxsus xizmatlari tomonidan Donetskdagi bir qator ijtimoiy infratuzilma obyektlari keyinchalik portlatish maqsadida minalashtirilgani to‘g‘risida ma’lumotlarga ega. Bu kabi chora-tadbirlar davlatimizning vaqtincha egallab olingan hududlaridagi vaziyatni beqarorlashtirish va Ukrainani terrorchilik xurujlarida ayblash uchun asos yaratishga qaratilgan”, — deyiladi razvedkaning Facebook’dagi sahifasiga joylashtirilgan bayonotda. Ukraina Birlashgan kuchlar qo‘mondoni Aleksandr Pavlyukning ta’kidlashicha, ukrainalik harbiylar fuqarolik infratuzilmalariga hujum qilmayapti va tinch aholini o‘qqa tutmayapti.
Danilovning qayd etishicha, Kiyevning Donbassda sodir etishi mumkin bo‘lgan portlashlarga hech qanday aloqasi yo‘q. “Ular nimani o‘ylab topishini ayta olmaymiz: Rostov yoki Rostov viloyatiga ko‘chishni tavsiya qilgan odamlarini olib kelayotgan avtobuslarni, uylarni yoki boshqa yana nimanidir portlatishi mumkin. Shuni yana bir bor qaytaraman: bunga bizning hech qanday aloqamiz yo‘q”, — deydi Mudofaa va milliy xavfsizlik kengashi kotibi.
Avvalroq Putin Rostov viloyatiga Donbass va Luganskdan kelgan har bir odamga 10 ming rubldan tarqatish haqida topshiriq bergandi.
Izoh (0)