Mask Kanada bosh vazirini Gitlerga qiyosladi

SpaceX asoschisi va Tesla bosh direktori Ilon Mask Kanada bosh vaziri Jastin Tryudoni Adolf Gitlerga qiyosladi, deb yozmoqda Daily Mail.

Mask o‘zining Twitter’dagi sahifasiga Gitlerning suratini joylashtirib shunday post qoldirgan: “Meni Jastin Tryudo bilan solishtirishni bas qiling, mening budjetim bor edi”. Taxminlarga ko‘ra, Mask bu postni Tryudo hukumati banklarga mamlakatda davom etayotgan norozilik namoyishi ishtirokchilarini moliyalashtirishni qisqartirish haqida bergan buyrug‘iga javoban joylashtirgan. Shu orqali Mask hukumatdan norozi kanadalik yuk mashina haydovchilarini qo‘llab-quvvatlamoqchi bo‘lgan.

Post tadbirkorning akkauntida 16-fevral kuni Kaliforniya vaqti bilan yarim tunga yaqin paydo bo‘lgan, keyinroq tadbirkor tvitni izohsiz o‘chirib tashlagan. Tvit 35 000 dan ortiq layk va 9 000 retvit yig‘gan, ayni paytda postga foydalanuvchilar tomonidan turlicha munosabat bildirildi.

Jumladan, Kanada innovatsiyalar, fan va sanoat vaziri Fransua-Filip Shampan Maskning postini “shokka soladigan” deb atadi.

“Kanada va kanadaliklar nimani anglatishini sizga eslatib qo‘ysam. Kanadaliklar barqarorlik, oldindan aytib bo‘lishlik va qonun ustuvorligini qadrlaydi. Biz hamisha ushbu qadriyatlarni himoya qilamiz”,  — deb yozgan u Twitter’da.

Osvensim natsislar konslageri joylashgan hududdagi Aushvits-Birkenau muzeyi hamda Amerika yahudiylar qo‘mitasi Maskni tviti uchun qoraladi.

“Ilon Mask ijtimoiy tarmoqlarda o‘z nuqtayi nazarini bildirish uchun Gitlerga ishora qilib, nihoyatda nodonlik qildi. U zudlik bilan uzr so‘rashi kerak”, — deyiladi Amerika yahudiylar qo‘mitasi munosabatida.

“Bu natsislar tuzumi qurbonlari xotirasiga hurmatsizlikdir, shuningdek, ko‘plab odamlarni ranjitadi”, — deyiladi Osvensim muzeyida. Milliarderning o‘zi bu mojaroga izoh bermadi, lekin o‘z akkauntida shunday post qoldirdi: “Sevish uchun sabablardan ko‘ra nafratlanish uchun sabablar yaxshiroq esda qoladi”.