Donbass va Lugansk aholisi Rossiyaga evakuatsiya qilinmoqda. Ukraina harbiy operatsiyalar boshlashi haqidagi ayblovlarni inkor etdi. Asosiy ma’lumotlar
Donbass Xalq Respublikasi odamlarning Rossiyaga evakuatsiya qilinishi haqida xabar berdi. DXR rahbari Denis Pushilin birinchi navbatda ayollar, bolalar va keksa kishilar olib ketilishini bildirdi. Uning so‘zlariga ko‘ra, evakuatsiya qilinganlar Rostov viloyatiga joylashtiriladi, u yerda odamlarga barcha zarur shart-sharoitlar yaratiladi. Pushilinning murojaatidan keyin Donetskda sirenalar yoqildi, fuqarolar esa bankomatlar oldida turnaqator navbatlar hosil qildi.
Keyinroq Lugansk Xalq Respublikasi ham aholi evakuatsiyasi boshlanishini e’lon qildi. Lugansk rahbari Leonid Pasechnik o‘zini xavfsizlikda sezmayotgan, hayot kechirishi uchun zarur ijtimoiy himoyaga muhtoj aholidan qisqa vaqt ichida Rossiyaga ketishni so‘ragan.
Rostov viloyati gubernatori Rossiya prezidentiga murojaat qildi. Hudud rahbari Vasiliy Golibev Vladimir Putindan qochoqlarning katta oqimini boshqarish uchun favqulodda tezkor yordam ko‘rsatishni iltimos qildi, deya xabar qilgan Rossiya prezidentining matbuot kotibi Dmitriy Peskov. O‘z navbatida Putin Rostov viloyatiga favqulodda vaziyatlar vaziri vazifasini bajaruvchi Aleksandr Chupriyanni yuborib, unga Donbassdan kelayotgan odamlar uchun zarur shart-sharoitlarni hozirlashni buyurgan. Shuningdek, Rossiya prezidenti hukumatga Donbass va Luganskdan kelgan har bir odam uchun 10 ming rubldan to‘lash haqida topshiriq bergan.
DXR va LXR evakuatsiyaga hududdagi keskinlikning kuchayishi sabab bo‘lganini qayd etgan. “So‘nggi oylarda DXRda Ukraina harbiylari ko‘paygan va qurol-yarog‘lar ham joylashtirilmoqda, Vladimir Zelenskiy ham tez orada harbiylarga hujumga o‘tish yuzasidan topshiriq berishi mumkin”, – degan Pushilin. Pasechnik esa zo‘ravon Ukraina hujum ehtimoli yuqori bo‘lgan hududlarda provokatsiya va fitnalar bilan LXR hududiga bostirib kirmoqchiligini ta’kidlagan. U Luganskda qo‘liga qurol olishni uddalaydigan barcha erkaklardan o‘z yerini himoya qilishni so‘ragan.
Pushilin evakuatsiya haqida gapirgandan bir necha soat vaqt o‘tgach, yangi hujumga hozirlik ko‘rilayotgani, urush boshlanishi mumkinligi 100 minglab odamlar Rossiyaga qochoq sifatida borishi haqida gapirgan. DXR favqulodda vaziyatlar vazirligi 700 ming nafar odamning evakuatsiya qilinayotganini ma’lum qilgan. Dastlabki avtobuslar mahalliy vaqt bilan 20:00 da Rostov tomon yo‘l olgan.
Ukraina Donbassga hujum qilishga shaylanayotgani haqidagi xabarlarni inkor etdi. “Rossiya propagandasining Ukraina harbiy hujum operatsiyalariga tayyorlanayotgani haqidagi xabarlarini inkor qilamiz. Ukraina Donbassda bu kabi harakatlar qilmaydi va ularni rejalashtirmagan. Biz vaziyatni diplomatik yo‘l bilan hal etishga e’tiborimizni qaratganmiz”, — deb yozgan Twitter’da Ukraina tashqi ishlar vaziri Dmitriy Kuleba. Ukraina qurolli kuchlari bosh qo‘mondoni Valeriy Zalujniy Donbassning ukrainalik harbiylar hujumi haqidagi bayonotlari haqiqatdan yiroqligini qayd etgan. Mamlakat prezidenti Vladimir Zelenskiy vaziyat yuzasidan izoh bermagan.
Donbass aholisi 18-fevralda Rossiyaga evakuatsiya qilina boshlagan. “Interfaks” agentligi birinchi navbatda Donetskdagi 1-maktab-internatning 225 nafar yetim bolalari Rostovga olib kelingan. Gorlovka (Donbassda) aholisi uchun avtobuslar mahalliy vaqt bilan 19:30 da yetib borgan. Shahar ma’muriyati evakuatsiya qilinadigan odamlar to‘planadigan manzillar va o‘zi bilan olish zarur bo‘lgan birlamchi buyumlar haqidagi ro‘yxatni e’lon qilgan. Shuningdek, mahalliy boshqaruv organi 20:00 DXRdagi Yasunovataya shahrida aholini evakuatsiya qilish boshlanishi haqida ma’lumot bergan.
LXR hukumati birinchi navbatda to‘qnashuv yuz berishi mumkin bo‘lgan hududlardagi aholini xavfsiz yerga ko‘chirmoqchi. Respublika ta’lim vazirligi barcha o‘quv muassasalaridagi darslarni vaqtincha to‘xtatgan, shuningdek bolalar uylari va maktab-internatlardagi o‘quvchilarning evakuatsiyasi boshlanishini bildirgan.
Donetskdagi hukumat binosi oldida portlash yuz bergan. DXR xalq militsiyasi boshlig‘i Denis Sinenkov “Interfaks”ga uning avtomobili avtoturargohda portlab ketganini ma’lum qilgan. Portlashda hech kimga talafot yetmagan.
Rubl kursi va Rossiya qimmatli qog‘ozlar bozori quladi. Mahalliy vaqt bilan 19:00da dollar 67,25 dan 76,96 ga oshgan, yevro ham 69,75 dan 87,27 ga ko‘tarilgan. Asosiy savdolar yakuniga ko‘ra Moskva birjasi indeksi 3393,31 punkt (-3,4 foiz), RTS indeksi esa — 1391,31 punktni (-4,1 foiz) tashkil etgan.
