Rossiyada ballistik raketalarni uchirish bo‘yicha mashg‘ulot o‘tkaziladi. Unga Putinning o‘zi rahbarlik qiladi

19-fevral kuni Rossiyada ballistik va qanotli raketalarni uchirish bo‘yicha o‘quv mashg‘ulotlari o‘tkaziladi. Strategik kuchlarning mashg‘ulotlariga Vladimir Putin shaxsan rahbarlik qiladi, deb yozmoqda “RBK” Rossiya Mudofaa vazirligiga tayanib.

Mashg‘ulotlar harbiy boshqaruv organlari, jangovar ekipajlar, kemalar ekipajlari va raketa tashuvchilarning tayyorgarligini, strategik yadroviy va noyadroviy kuchlar qurol-yarog‘larining ishonchliligini sinovdan o‘tkazish maqsadida oldindan rejalashtirilgan, deyiladi vazirlik xabarida.

Mashg‘ulotlarda Aerokosmik kuchlar, Janubiy harbiy okrug, Strategik raketa qo‘shinlari, Shimoliy va Qora dengiz flotlari bo‘linmalari ishtirok etadi.

Amerikaning Financial Times gazetasi AQSh Kongressidagi manbaga tayanib, Rossiya strategik kuchlarining mashg‘ulotlari ikki haftadan buyon ortga surilayotgani haqida yozgan.

Nashr suhbatdoshiga ko‘ra, Rossiya mashg‘ulot o‘tkazish niyati haqida AQSh Qurolli kuchlari shtab boshliqlari birlashgan qo‘mitasi raisi general Mark Milli va Milliy razvedka direktori Evril Xeynsga 3-fevral kuni Vakillar palatasida o‘tkazilgan yopiq brifingda ma’lum qilgan. Odatda bunday mashg‘ulotlar kuzda bo‘lib o‘tadi, ammo bu safar Ukraina atrofidagi vaziyatning keskinlashuvini inobatga olib, ularni fevral oyiga ko‘chirishga qaror qilingan, deydi AQSh harbiylari.

Rossiya Mudofaa vazirligi rahbari Sergey Shoygu 2021-yilning dekabr oyida ham “Vostok” va “Grom” strategik qo‘mondonlik-shtabi o‘quv mashg‘ulotlari o‘tkazilishi haqida gapirgan ammo mashg‘ulotlar sanasini aytmagan. Yanvar oyi boshida “TASS”ning Mudofaa vazirligiga yaqin manbasi ular yil boshida o‘tkazilishini aytgan. Agentlikning qayd etishicha, harbiylar odatda bunday mashg‘ulotlarni yil oxiriga kelib o‘tkazadi. An’anaga ko‘ra, mashg‘ulotlarda Kamchatkadagi Kura poligonidan qit’alararo ballistik raketa uchiriladi.