Rossiya prezidenti Vladimir Putin o‘zini o‘zi mustaqil davlat deb e’lon qilgan, mustaqilligi tan olinmagan Donbass Xalq Respublikasi va Lugansk Xalq Respublikasi hududlaridan Rostov viloyatiga kelgan har bir odamga 10 ming rubldan tarqatish haqida topshiriq berdi. Bu haqda “TASS” xabar qilgan.
Rossiya hukumati mazkur mablag‘lar zaxira jamg‘armasi hisobidan qoplanishini bildirgan.
Shuningdek, Putin Rossiya favqulodda vaziyatlar vaziri vazifasini vaqtincha bajaruvchi Aleksandr Chpriyanga Rostov viloyatiga darhol yetib borish hamda LXR va DXRdan kelganlar uchun zarur shart-sharoitlarni yaratishni buyurgan.
Rostov viloyatida ikki hududdan kelganlarni evakuatsiya qilish bo‘yicha tezkor shtab tashkil qilingan.
DXR va LXR hukumatlari aholining Rossiyaga evakuatsiya qilinishi haqida 18-fevralda ma’lum qilgan. Ular mazkur holatni hududdagi vaziyatning keskinlashgani bilan izohlagan. Xabarlarga ko‘ra, ikki hududdan evakuatsiya qilinadigan odamlar o‘tirgan avtobuslar mahalliy vaqt bilan soat 20:00 da yo‘lga chiqqan.
O‘z navbatida, Ukraina rasmiylari Donbassga hech qanday hujum operatsiyalarini boshlashni rejalashtirmayotganini ta’kidlagan.
Avval Kreml Donetsk va Lugansk mustaqilligini tan olish Minsk kelishuvlarini buzishi haqida bayonot bergani, Zelenskiy Donbassda Ukraina OAVlarining ta’sirini kuchaytirishga chaqirgani, keyinchalik Ukraina prezidentining Donbassda bir sutkadan kamroq vaqt ichida 500 ga yaqin portlash qayd etilgach u yerga borgani, Rossiya va AQShdan Ukraina uchun xavfsizlik kafolatlarini talab qilgani, shuningdek, Putinga “istalgan formatda” uchrashishni taklif etgani haqida xabarlar berilgandi.
Izoh (0)