Украина Мудофаа вазирлигининг Разведка бош бошқармаси Россия махсус хизматлари Донецкдаги бир қатор ижтимоий инфратузилма объектларини миналаштирганини маълум қилди, деб хабар беради «Коммерсантъ».
Киевнинг ҳисоблашича, бу Украинани терактларда айблаш учун керак. Украина Мудофаа ва миллий хавфсизлик кенгаши котиби Алексей Данилов ДХР ва ЛХР аҳолисини эвакуация қилаётган автобуслар портлатиши мумкинлигини тахмин қилмоқда.
«Украина ҳарбий разведкаси Россия махсус хизматлари томонидан Донецкдаги бир қатор ижтимоий инфратузилма объектлари кейинчалик портлатиш мақсадида миналаштирилгани тўғрисида маълумотларга эга. Бу каби чора-тадбирлар давлатимизнинг вақтинча эгаллаб олинган ҳудудларидаги вазиятни беқарорлаштириш ва Украинани террорчилик хуружларида айблаш учун асос яратишга қаратилган», — дейилади разведканинг Facebook’даги саҳифасига жойлаштирилган баёнотда. Украина Бирлашган кучлар қўмондони Александр Павлюкнинг таъкидлашича, украиналик ҳарбийлар фуқаролик инфратузилмаларига ҳужум қилмаяпти ва тинч аҳолини ўққа тутмаяпти.
Даниловнинг қайд этишича, Киевнинг Донбассда содир этиши мумкин бўлган портлашларга ҳеч қандай алоқаси йўқ. «Улар нимани ўйлаб топишини айта олмаймиз: Ростов ёки Ростов вилоятига кўчишни тавсия қилган одамларини олиб келаётган автобусларни, уйларни ёки бошқа яна ниманидир портлатиши мумкин. Шуни яна бир бор қайтараман: бунга бизнинг ҳеч қандай алоқамиз йўқ», — дейди Мудофаа ва миллий хавфсизлик кенгаши котиби.
Аввалроқ Путин Ростов вилоятига Донбасс ва Луганскдан келган ҳар бир одамга 10 минг рублдан тарқатиш ҳақида топшириқ берганди.
Изоҳ (0)