AQSh prezidenti Jo Bayden va Shimoliy Koreya yetakchisi Kim Chen In ikki davlat o‘rtasidagi murosasizlikka qaramay, yuzma-yuz uchrashadi, dedi Janubiy Koreya prezidenti Mun Chje In Yonhap axborot agentligiga bergan intervyusida.
“Muammolarni hal qilishning yagona yo‘li muloqot bo‘lgani uchun prezident Bayden va rais Kim Chen In o‘rtasida yakunda uchrashuv bo‘lib o‘tishi kutilmoqda. Bu vaqt masalasi”, — deydi Mun Chje In.
Bayden bir necha bor Shimoliy Koreya bilan muammolarni hal qilish bo‘yicha muzokaralarda faol ishtirok etishga tayyorligini bildirgan, deya eslatdi Janubiy Koreya rahbari.
“AQSh Shimoliy Koreya bilan aloqalarni yo‘lga qo‘yish bo‘yicha amaliy sa’y-harakatlar olib bormoqda, shuningdek, u Koreya yarim orolini yadrosizlantirish masalasi ma’muriyat tashqi siyosatining ustuvor yo‘nalishlaridan biri ekanini va AQSh hech qanday shartlarsiz Shimoliy Koreya bilan istalgan vaqtda, istalgan joyda uchrashishga tayyor ekanini izchil ta’kidlab keladi”, — dedi Mun Chje In.
U, agar Bayden va Kim Chen In o‘rtasida uchrashuv bo‘lib o‘tsa, unda Xanoydagi sammitdan farqli o‘laroq, “yarim orolni yadrosizlantirish, tinchlik o‘rnatish, Shimoliy Koreya va AQSh munosabatlarini normallashtirish yo‘lida muhim yutuqlarga erishiladi” degan umidda ekanini bildirdi.
Mun Chje In, shuningdek, Shimoliy Koreyaga ma’qul istalgan formatda Koreyalararo sammitni hech qanday old shartlarsiz o‘tkazishga tayyorligini aytdi. “Muloqot qilish istagi bor ekan, sammit yuzma-yuz yoki virtual bo‘ladimi, farqi yo‘q. Shimoliy Koreya istagan har qanday usul maqbul bo‘ladi”, — dedi u.
Mun Chje Inning qo‘shimcha qilishicha, Janubiy Koreyada bo‘lajak prezidentlik saylovlari va uning natijalari Koreyalararo sammit o‘tkazish rejasini puchga chiqarishi mumkin.
Shu bilan birga, uning qayd etishicha, agar Shimoliy Koreya uzoq masofali raketalarni sinovdan o‘tkazishga qo‘ygan moratoriyni bekor qilsa, Koreya yarim oroli bir zumda besh yil avvalgidek inqiroz holatiga qaytadi. “Doimiy muloqot va diplomatiya orqali bunday inqirozning oldini olish tegishli davlatlarning siyosiy rahbarlari birgalikda amalga oshirishi kerak bo‘lgan vazifa”, — dedi u.
2022-yil boshidan buyon KXDR bir qator raketa sinovlarini o‘tkazdi. BMT Xavfsizlik Kengashining qator a’zolari Shimoliy Koreyaning sinovlarini qoraladi.
Izoh (0)