Eron o‘zi ishlab chiqargan va 1450 kilometr masofaga ucha oladigan yangi raketasini namoyish qildi, deb yozadi Reuters.
Yaqin Sharqdagi eng yirik raketa dasturlaridan biriga ega Eron, go‘yoki Isroil hududiga yetib borib, hududda joylashgan AQSh bazalariga zarba berishga qodir Kheibar Shekan nomli yangi harbiy raketasini namoyish qildi. E’lon qilingan uchish masofasi — 1450 kilometr.
“Mamlakatda ishlab chiqarilgan ushbu uzoq masofali raketa Islom inqilobi posbonlari korpusi (IRGC) tomonidan taqdim etildi. U yuqori aniqlikda, qattiq yoqilg‘i bilan harakatlanadi va raketa qalqonlarini teshib o‘tishga qodir”, — deyiladi Eron davlat OAVlari xabarida.
Reuters agentligining qayd etishicha, raketaning nomi ramziy ma’noga ega. Kheibar Shekan — yahudiylarning Xaybar qal’asiga ishora bo‘lib, u hozir Saudiya Arabistonida joylashgan. Qal’a musulmonlar tomonidan 7-asrda egallab olingan.
Eronning yangi raketa to‘g‘risidagi bayonoti 2015-yilgi yadroviy kelishuvni yangilash bo‘yicha Venada AQSh bilan bilvosita muzokaralar qayta boshlanganidan bir kun o‘tib e’lon qilindi.
Eslatib o‘tamiz, Tehron o‘zining raketa dasturini AQSh, Isroil va boshqa raqiblariga qarshi muhim to‘xtatuvchi vosita sifatida ko‘radi. Eron G‘arbning ballistik raketalar yaratishni to‘xtatish haqidagi talablarini rad etgan.
“Eron o‘zining ballistik raketa dasturini rivojlantirishda davom etadi”, — dedi Eron Qurolli kuchlari shtabi boshlig‘i general-mayor Muhammad Bag‘iriy yangi raketaning taqdimoti o‘tkazilgan IRGC bazasidagi tadbirda.
Eslatib o‘tamiz, 2015 yilda Buyuk Britaniya, Germaniya, Xitoy, Rossiya, AQSh, Fransiya va Eron o‘rtasida “Birgalikdagi harakatlar rejasi” deb nomlanadigan kelishuv imzolangan. Kelishuv Eronning yadroviy dasturini cheklash evaziga Tehronga nisbatan kiritilgan sanksiyalarni bekor qilishni nazarda tutgan. Keyinchalik Eronni mazkur kelishuvni qo‘pol ravishda buzganlikda ayblashdi. 2018-yil may oyi boshida AQSh kelishuvdan bir tomonlama chiqishini e’lon qildi va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etdi.
Izoh (0)