Rossiyaning Suriyadagi Nizolashayotgan tomonlarni yarashtirish markazida IShID tashkilotining sobiq jangarilari mamlakatni soxta pasportlar yordamida tark etayotgani to‘g‘risida ma’lumotlar mavjud. Bu haqda markaz boshlig‘i o‘rinbosari Oleg Juravlyovga tayanib, “RBK” xabar berdi.
“Ushbu shaxslar viza muhrlari tushirilgan qalbaki pasportlardan foydalanib, AQSh, Kanada va Yevropa Ittifoqi mamlakatlariga chiqib ketmoqda”, — deydi Juravlyov.
Uning so‘zlariga ko‘ra, gap AQSh qo‘llab-quvvatlovi ostida afv etilgan jangarilar haqida ketmoqda. Ilgari ular Suriyaning “kurd ma’muriyati nazorati ostidagi qamoqxonalarida” hibsda bo‘lgan.
Yanvar oxirlarida IShID a’zolari Suriyaning Xaseke viloyatidagi qamoqxonaga hujum uyushtirib, u yerda saqlanayotgan jangarilarni ozod etishga uringandi. Portlovchi qurilmalar o‘rnatilgan ikkita mashina IShID tarafdorlari bo‘lgan jangarilar saqlanayotgan qamoqxona darvozasi oldida portlagan. Shundan so‘ng, hujum uyushtirganlar va qamoqxona qo‘riqchilari o‘rtasida otishga yuzaga kelgandi. Kurdlar tomonidan tarqatilgan bayonotda hujum qaytarilgani ma’lum qilingan.
8-fevral kuni Rossiya Tashqi razvedka xizmati Amerika maxsus xizmatlari Damashq va Latakiyadagi “uxlayotgan” ekstremistlar e’tiborini mahalliy kuch tuzilmalariga qarshi aksiyaga, shuningdek, Rossiya va Eron harbiy xizmatchilariga qaratmoqchi ekani to‘g‘risida xabar bergan. Idora ma’lumotlariga ko‘ra, AQSh shu orqali Suriyadagi vaziyatni izdan chiqarmoqchi.
Avvalroq Rossiyaning BMTdagi doimiy vakilining birinchi o‘rinbosari Dmitriy Polyanskiy Suriyada “qonunsizlik hududlari” shakllangani va u yerda xorijlik terrorchilar mavjudligi to‘g‘risida ma’lum qilgandi. U bunda AQSh va mamlakatda bo‘lib turgan boshqa qo‘shinlarni ayblagan va ularni Suriyani tark etishga chaqirgan edi.
AQSh o‘zining harbiy kontingentini Suriyaga 2011-yilda, fuqarolik urushi boshlangan vaqtda kiritgan. 2018-yilning dekabrida AQSh sobiq prezidenti Donald Tramp amerikalik harbiylar Suriyani tark etishini e’lon qilgan. U o‘z qarorini IShID jangarilarining asosiy qismi yakson etilgani bilan izohlagan. 2021-yilning yozida, AQSh hukumatining ma’lumotlariga ko‘ra, Suriyada 900 ga yaqin amerikalik harbiy bo‘lgan. Pentagon qo‘shinlarni olib chiqib ketishga erta ekani, chunki IShIDga qarshi kurashish davom etayotganini bildirgan. 2022-yilning fevral boshida AQSh prezidenti Jo Bayden Suriya shimoli-g‘arbida terrorchilarning yetakchilaridan biri Abu Ibrohim al-Hoshimiy al-Qurashiy o‘ldirilganini e’lon qildi.
Izoh (0)