Londondagi auksionda og‘irligi 555,55 qirotga teng noyob qora brilliant 4 292 322 dollarga sotildi. Bu haqda Sotheby’s kimoshdi uyi xabar berdi.
“Og‘irligi 555,55 qirotga teng mazkur qora brilliant bugun 4 292 322 dollarga sotildi. Mijoz xaridni amalga oshirishda kriptovalyutadan foydalanishga qaror qildi”, — deyiladi kimoshdi uyining Twitter’dagi sahifasida.
Ta’kidlash kerakki, 4 million dollardan qimmatroqqa sotilgan mazkur brilliant auksionlar tarixida qirralangan eng yirik olmos hisoblanadi. U 2006-yilda Ginnesning rekordlar kitobiga ham kiritilgan.
Auksiondan so‘ng kriptotadbirkor Richard Xerd ijtimoiy tarmoqlar orqali “Enigma”ni aynan u sotib olganini ma’lum qilgan. “To‘lov amalga oshirilishi va egalik huquqi qo‘lga kiritilishi bilan toshning nomi ‘HEX.com brillianti’ga o‘zgartiriladi”, — deydi u. HEX.com tadbirkor tomonidan asos solingan blokcheyn-platformadir.
Ushbu qimmatbaho toshning kelib chiqishi haqida ko‘plab farazlar mavjud bo‘lib, ularning ayrimlariga ko‘ra, olmos Yerga asteroid orqali kelib qolgan. Tosh tabiiy olmosning eng qattiq shakllaridan biri bo‘lgan karbonado turiga mansub. Karbonado juda noyob va faqatgina Braziliya va JARdan topilgan. Ular tarkibida faqat meteoritlarda uchratish mumkin bo‘lgan osbornit minerali borligi sabab koinotdan kelgan deb hisoblanadi.
“Enigma”ning original nusxasi 1990-yillar oxirida xarid qilingan va uning og‘irligi 800 qirotdan ortiqni tashkil etgan. Qimmatbaho tosh qayta ishlanmagan, uni hozirgi shakliga keltirish uchun uch yil kerak bo‘lgan.
Eslatib o‘tamiz, 2020-yilning yanvarida Louis Vuitton modalar uyi dunyodagi eng yirik olmosni 50 million dollarga sotib olgandi.
Izoh (0)