18—20-fevral kunlari bo‘lib o‘tadigan xavfsizlik bo‘yicha Myunxen konferensiyasida Rossiyaning rasmiy vakillari ishtirok etmaydi. Bu haqda Rossiya Tashqi ishlar vazirligining rasmiy vakili Mariya Zaxarova brifingda ma’lum qildi, deb yozadi Meduza.
Zaxarovaning ta’kidlashicha, “so‘nggi yillarda konferensiya tobora transatlantik forumga aylanib, o‘zining inklyuzivligi va obyektivligini yo‘qotmoqda”, natijada “Moskvaning ushbu tadbirga qiziqishi sezilarli darajada pasaygan”.
“Kommersant” xabariga ko‘ra, Rossiyaning Myunxenga rasmiy delegatsiya yuborishdan bosh tortishiga ular Yevropa Ittifoqida tasdiqlanmagan vaksinalar bilan emlangani uchun olti kunlik karantindan o‘tishga majbur bo‘lishi, shuningdek, so‘nggi paytlarda tadbir tashkilotchilarining Rossiya tashqi siyosatini tanqid qiluvchi bayonotlari sabab bo‘lgan.
Avvalroq Rossiyadan Myunxen konferensiyasiga yuboriladigan delegatsiya ro‘yxatiga “Sberbank” rahbari German Gref, Butunrossiya sug‘urtachilar ittifoqi prezidenti Igor Yurgens va Rossiya Fanlar akademiyasining Jahon iqtisodiyoti va xalqaro munosabatlar instituti prezidenti Aleksandr Dinkin kiritilgan edi. Rossiya prezidenti Vladimir Putinning matbuot kotibi Dmitriy Peskov Putin bu yil ham konferensiyada ishtirok etmasligini aytgandi.
Xavfsizlik bo‘yicha Myunxen konferensiyasi 1962-yildan beri o‘tkazib kelinadi. Rossiya forumda 1999-yildan beri qatnashayotgan edi.
Rossiya prezidenti Vladimir Putin faqat bir marta, 2007-yilda ushbu konferensiyada qatnashdi. U Myunxenda nutq so‘zladi va unda “bir qutbli dunyo modeli”, AQSh va NATOni tanqid qildi. Ushbu nutq Rossiya va G‘arb o‘rtasidagi munosabatlar yomonlashuvining boshlang‘ich nuqtalaridan biri sifatida ko‘riladi.
2010-yildan beri Myunxen konferensiyasidagi Rossiya delegatsiyasiga tashqi ishlar vaziri Sergey Lavrov boshchilik qildi (2016-yil bundan mustasno, o‘sha paytda Rossiya bosh vaziri bo‘lgan Dmitriy Medvedev Myunxenga kelgan). 2021-yilda esa pandemiya sababli konferensiya bekor qilindi.
Izoh (0)