AQSh Senati razvedka qo‘mitasining bir guruh a’zolari prezident Jo Baydenga ochiq xat yozib, Ukraina bilan bo‘lishiladigan razvedka ma’lumotlarining miqdorini oshirishni so‘radi. Maktub matni qo‘mita rahbari Mark Uornerning rasmiy sahifasida e’lon qilingan.
“Vladimir Putin ukrainaliklarning erkinligi va xavfsizligiga tahdid solmoqda, ukrainaliklar esa o‘z suvereniteti, erkinligi va demokratik yo‘l bilan saylangan hukumatini himoya qilish yo‘lida harakat qilishga tayyor ekanini namoyish etmoqda”, — deyiladi hujjatda.
Shu munosabat bilan qonunchilar Oq uy rahbariga AQShdan Ukrainaga Rossiya haqidagi razvedka ma’lumotlarini imkon qadar ko‘proq uzatishni so‘rab murojaat qilgan.
“Rossiya — tajovuzkor, biz Ukrainani himoya qilish uchun zarur bo‘lgan muhim ma’lumotlar bilan mamlakatni qurollantirishimiz kerak. Bu AQSh milliy xavfsizligi, shuningdek, mintaqadagi ittifoqdoshlarimiz va hamkorlarimiz manfaatlariga mos keladi”, — deydi maktub mualliflari.
Senatorlar Rossiyaning Ukrainaga qarshi tahdidlari butun dunyo demokratiyasi uchun xavf tug‘dirayotganini ta’kidladi, shuning uchun ular AQSh prezidentini “Ukrainani hozirgi keskin pallada qo‘llab-quvvatlash uchun hamma chorani ko‘rishga” chaqirdi.
Avvalroq Jo Bayden va Germaniya kansleri Olaf Shols Vashingtonda Ukraina atrofidagi vaziyat, Rossiyani jilovlash va energetika bilan bog‘liq masalalarni muhokama qilgandi. Shuningdek, Fransiya, Germaniya va Polsha Rossiyani Yevropada xavfsizlik masalalari bo‘yicha muloqotga chaqirgan.
2021-yilning kuzidan beri Rossiya Ukraina chegaralari yaqinida qo‘shinlarini to‘plamoqda, shu sababli G‘arb davlatlari Rossiyaning Ukrainaga bostirib kirishidan cho‘chimoqda. G‘arbga ko‘ra, Ukraina chegarasida 100-125 ming rossiyalik askar bor. Rossiya hukumati qo‘shinlarning harakatini odatiy mashg‘ulotlar bilan izohlab, ular biror mamlakatga hujum qilmoqchi emasligiga ishontirmoqda.
Yanvar oxirida The Washington Post nashri manbalariga tayanib, Ukraina razvedkasi Kiyevdagi bosh ofisidan maxfiy materiallar va uskunalarni Ukraina g‘arbidagi xavfsiz joyga ko‘chirganini xabar qildi. Qayd etilishicha, maxfiy hujjatlarning poytaxtdan olib chiqilishi Ukrainaning Rossiya bosqiniga hozirlik ko‘rayotganidan dalolat beradi.
Izoh (0)