Rossiyaning COVID-19 ga qarshi kurash bo‘yicha federal tezkor shtabi ma’lumotlariga ko‘ra, mamlakatda bir sutkada 197 076 kishida COVID-19 tasdiqlandi. Bu pandemiya boshidan buyon kunlik kasallanishlar bo‘yicha maksimal ko‘rsatkich.
Rossiyada o‘tgan bir sutkada 19 446 kishi kasalxonaga yotqizildi — bu 9-fevraldagidan 3,63 foizga kam. Shuningdek, 701 kishi infeksiya asoratlaridan vafot etdi.
Bir kun avval, 9-fevral kuni mamlakatda 183 103 ta kishida koronavirus aniqlanib, 669 nafar bemor vafot etgandi. O‘sha kuni 20,1 ming kishi shifoxonalarga yotqizilgan (8-fevraldagidan 0,03 foizga kam)
Rossiyada COVID-19 bilan kunlik kasallanishlar 21-yanvardan beri rekordlarini yangilamoqda, faqat 7 va 8-fevral kunlari kasallanish biroz pasayib, mustasno bo‘ldi.
Omikron shtammining tarqalishi tufayli COVID-19 ga chalinayotganlar ulushi ham oshdi. Ilgari koronavirusdan tuzalganlarning 0,7 foizidan ko‘pi virusni qayta yuqtirgan bo‘lsa, hozir ularning ulushi 15 foizga yetdi, deydi Gamaleya markazining rahbari Aleksandr Ginsburg.
Uning aytishicha, koronavirusga chalinish bilan bog‘liq vaziyat yaqin kunlarda yaxshilanadi va Rossiya kasallanish cho‘qqisiga yetishi mumkin, dekabr o‘rtalarida boshlangan to‘lqin bir yarim-ikki oy ichida tugaydi.
Federal shtab ma’lumotlariga ko‘ra, Rossiyada jami 13 527 845 kishida koronavirus aniqlangan. COVID-19 tashxisi bilan 338 091 kishi vafot etgan.
Izoh (0)