АҚШ президенти Жо Байден ва Шимолий Корея етакчиси Ким Чен Ин икки давлат ўртасидаги муросасизликка қарамай, юзма-юз учрашади, деди Жанубий Корея президенти Мун Чже Ин Yonhap ахборот агентлигига берган интервьюсида.
«Муаммоларни ҳал қилишнинг ягона йўли мулоқот бўлгани учун президент Байден ва раис Ким Чен Ин ўртасида якунда учрашув бўлиб ўтиши кутилмоқда. Бу вақт масаласи», — дейди Мун Чже Ин.
Байден бир неча бор Шимолий Корея билан муаммоларни ҳал қилиш бўйича музокараларда фаол иштирок этишга тайёрлигини билдирган, дея эслатди Жанубий Корея раҳбари.
«АҚШ Шимолий Корея билан алоқаларни йўлга қўйиш бўйича амалий саъй-ҳаракатлар олиб бормоқда, шунингдек, у Корея ярим оролини ядросизлантириш масаласи маъмурият ташқи сиёсатининг устувор йўналишларидан бири эканини ва АҚШ ҳеч қандай шартларсиз Шимолий Корея билан исталган вақтда, исталган жойда учрашишга тайёр эканини изчил таъкидлаб келади», — деди Мун Чже Ин.
У, агар Байден ва Ким Чен Ин ўртасида учрашув бўлиб ўтса, унда Ханойдаги саммитдан фарқли ўлароқ, «ярим оролни ядросизлантириш, тинчлик ўрнатиш, Шимолий Корея ва АҚШ муносабатларини нормаллаштириш йўлида муҳим ютуқларга эришилади» деган умидда эканини билдирди.
Мун Чже Ин, шунингдек, Шимолий Кореяга маъқул исталган форматда Кореялараро саммитни ҳеч қандай олд шартларсиз ўтказишга тайёрлигини айтди. «Мулоқот қилиш истаги бор экан, саммит юзма-юз ёки виртуал бўладими, фарқи йўқ. Шимолий Корея истаган ҳар қандай усул мақбул бўлади», — деди у.
Мун Чже Иннинг қўшимча қилишича, Жанубий Кореяда бўлажак президентлик сайловлари ва унинг натижалари Кореялараро саммит ўтказиш режасини пучга чиқариши мумкин.
Шу билан бирга, унинг қайд этишича, агар Шимолий Корея узоқ масофали ракеталарни синовдан ўтказишга қўйган мораторийни бекор қилса, Корея ярим ороли бир зумда беш йил аввалгидек инқироз ҳолатига қайтади. «Доимий мулоқот ва дипломатия орқали бундай инқирознинг олдини олиш тегишли давлатларнинг сиёсий раҳбарлари биргаликда амалга ошириши керак бўлган вазифа», — деди у.
2022 йил бошидан буён КХДР бир қатор ракета синовларини ўтказди. БМТ Хавфсизлик Кенгашининг қатор аъзолари Шимолий Кореянинг синовларини қоралади.
Изоҳ (0)