BMT tarkibiga kiruvchi institutlar Afg‘onistondagi vaziyatning halokatli ekanidan ogohlantirmoqda. Yanvar oyida Xalqaro mehnat tashkiloti mamlakatda hokimiyat tepasiga “Tolibon” kelganidan beri 500 mingga yaqin afg‘onistonlik ishsiz qolganini ma’lum qilgandi. Gumanitar masalalarni muvofiqlashtirish boshqarmasi Afg‘onistondagi shusiz ham murakkab vaziyat sovuq qish tufayli yanada og‘irlashayotganidan ogohlantirdi.
“Menimcha, BMT bahosi biroz bo‘yalgan. Aslida, vaziyat bundan ham yomon. Biz bu haqda oldingi oylarda bir necha bor gapirganmiz. Xalqaro tashkilot ma’lumotlariga ko‘ra, o‘tgan hafta Afg‘onistonda 135 nafar bola halok bo‘lgan. Ochlikdan. Bu aniq ma’lumot emas, chunki to‘liq ma’lumotlar yo‘q. O‘ylaymanki, ushbu misol vaziyatni hamma narsadan ko‘ra yorqinroq ifodalaydi”, — deydi BMT hisobotini izohlagan Rossiya prezidentining Afg‘oniston bo‘yicha maxsus vakili Zamir Kabulov.
Diplomatning fikricha, Afg‘onistonning AQShdagi davlat zaxiralarini blokdan chiqarish vaziyatni yaxshilashga yordam berishi mumkin. OAVlar hokimiyat tepasiga “Tolibon” kelganidan so‘ng, Amerika hisob raqamlarida “muzlatilgan” aktivlarni 9,5 milliard dollarga baholamoqda. “Tolibon” vakillari BMT va AQSh Kongressiga ushbu mablag‘larga qo‘yilgan taqiqlarni olib tashlash bo‘yicha so‘rov yuborgan, bu aholiga zarur oziq-ovqat va dori-darmon vositalarini xarid qilishga yordam berishini ta’kidlagan.
BMTning Jahon oziq-ovqat dasturi ma’lumotlariga ko‘ra, Afg‘onistonda 22 milliondan ortiq odam ochlikdan aziyat chekmoqda — bu mamlakat aholisining yarmidan ko‘pini tashkil etadi. Ushbu raqamlar 2021-yilning sentabrida, 14 million odamga ochlik xavfi haqiqatda tahdid sola boshlaganda ortgan. Tashkilotning hisob-kitoblariga ko‘ra, dekabr oyida aholining 95 foizi to‘yib ovqatlanmagan. Shuningdek, BMT ma’lumotlarida keltirilishicha, 2022-yil o‘rtalariga borib mamlakat aholisining 97 foizi qashshoq holga keladi.
Afg‘onistonda “Tolibon” hokimiyatga kelgach, AQSh hukumati afg‘on aktivlarini, Jahon banki va Xalqaro valyuta jamg‘armasi esa Afg‘oniston iqtisodiyoti va boshqaruvini qo‘llab-quvvatlashga mo‘ljallangan mablag‘larni “Tolibon” qo‘liga tushib qolishidan va noto‘g‘ri maqsadda ishlatilishidan qo‘rqib, muzlatib qo‘ygandi. Rossiya, Xitoy, Pokiston va bir qator MDH davlatlari AQSh sanksiyalari og‘ir ahvolda qolgan afg‘on xalqiga gumanitar yordam yetkazilishga to‘sqinlik qilayotganini da’vo qilib, bu pullarni blokdan chiqarishga chaqirmoqda.
Eslatib o‘tamiz, BMTning gumanitar masalalarni muvofiqlashtirish boshqarmasi 2022-yil yanvariga qadar Afg‘onistonda davom etayotgan gumanitar inqirozni hal etish uchun 1,5 milliard dollarga yaqin mablag‘ to‘plagan. Ushbu mablag‘lar qisman afg‘onlarni qishga tayyorlash, jumladan, naqd pul va nooziq-ovqat mahsulotlarini to‘g‘ridan to‘g‘ri taqsimlashni qo‘llab-quvvatlash uchun sarflangan.
Izoh (0)