Rossiyada bir kecha-kunduzda yana 155 768 kishida koronavirus qayd etildi, deb xabar beradi COVID-19 ga qarshi kurash bo‘yicha tezkor shtab. Bu pandemiya boshidan buyon maksimal ko‘rsatkich.
Mamlakatda o‘tgan sutkada 667 kishi kasallik oqibatlaridan vafot etgan. Kun davomida 17 792 bemor kasalxonaga yotqizilgan — bu umumiy kasallanganlar sonining 11,2 foiziga teng.
Bir kun avval, 2-fevral holatiga 141 883 kishida koronavirus qayd etilgandi, 17 201 bemor shifoxonalarga yotqizilgan, 678 kishi vafot etgan.
Pandemiya boshlanganidan buyon Rossiyada infeksiyaga chalinganlarning umumiy soni 12 284 564 nafarga yetdi, tezkor shtab ma’lumotlariga ko‘ra, ulardan 333 357 nafari vafot etgan. “Rosstat” (Federal Davlat statistika xizmati) esa birgina 2021-yilning dekabriga qadar 681,000 dan ortiq o‘limni hisoblagan. Bu raqamlar koronavirus o‘limning asosiy emas, qo‘shimcha sababi bo‘lgan holatlar haqidagi statistik ma’lumotlarni o‘z ichiga oladi.
O‘tgan sutkada eng ko‘p kasallanganlar Moskvada (26 904 kishi) va Sankt-Peterburgda (21 234) aniqlangan. Ikkala shaharda ham bu yangi maksimal ko‘rsatkich. Moskva viloyatida 8 721 kishida infeksiya tasdiqlangan. O‘lim darajasi bo‘yicha ham xuddi shu hududlar (mos ravishda 76, 56 va 36 kishi) yetakchilik qilmoqda.
29-yanvar holatiga Rossiyada bir sutkada 113 122 kishida koronavirus tasdiqlangandi. O‘shanda mamlakatda infeksiya bilan kunlik kasallanishlar soni birinchi marta olti xonali raqamlarni ko‘rsatgan.
Rossiyada koronavirusning yangi to‘lqini omikron shtammi tarqalishi fonida boshlandi. Avval “Rospotrebnadzor” rahbari Anna Popov vaziyat yomonlashsa, kunlik kasallanishlar soni 100 ming kishidan oshishi mumkinligidan ogohlantirgan edi.
So‘nggi o‘n kundan buyon mamlakatda COVID-19 ga chalinish holatlari tinimsiz rekord o‘rnatmoqda.
Izoh (0)