Россияда бир кеча-кундузда яна 155 768 кишида коронавирус қайд этилди, деб хабар беради COVID-19 га қарши кураш бўйича тезкор штаб. Бу пандемия бошидан буён максимал кўрсаткич.
Мамлакатда ўтган суткада 667 киши касаллик оқибатларидан вафот этган. Кун давомида 17 792 бемор касалхонага ётқизилган — бу умумий касалланганлар сонининг 11,2 фоизига тенг.
Бир кун аввал, 2 февраль ҳолатига 141 883 кишида коронавирус қайд этилганди, 17 201 бемор шифохоналарга ётқизилган, 678 киши вафот этган.
Пандемия бошланганидан буён Россияда инфекцияга чалинганларнинг умумий сони 12 284 564 нафарга етди, тезкор штаб маълумотларига кўра, улардан 333 357 нафари вафот этган. «Росстат» (Федерал Давлат статистика хизмати) эса биргина 2021 йилнинг декабрига қадар 681,000 дан ортиқ ўлимни ҳисоблаган. Бу рақамлар коронавирус ўлимнинг асосий эмас, қўшимча сабаби бўлган ҳолатлар ҳақидаги статистик маълумотларни ўз ичига олади.
Ўтган суткада энг кўп касалланганлар Москвада (26 904 киши) ва Санкт-Петербургда (21 234) аниқланган. Иккала шаҳарда ҳам бу янги максимал кўрсаткич. Москва вилоятида 8 721 кишида инфекция тасдиқланган. Ўлим даражаси бўйича ҳам худди шу ҳудудлар (мос равишда 76, 56 ва 36 киши) етакчилик қилмоқда.
29 январь ҳолатига Россияда бир суткада 113 122 кишида коронавирус тасдиқланганди. Ўшанда мамлакатда инфекция билан кунлик касалланишлар сони биринчи марта олти хонали рақамларни кўрсатган.
Россияда коронавируснинг янги тўлқини омикрон штамми тарқалиши фонида бошланди. Аввал «Роспотребнадзор» раҳбари Анна Попов вазият ёмонлашса, кунлик касалланишлар сони 100 минг кишидан ошиши мумкинлигидан огоҳлантирган эди.
Сўнгги ўн кундан буён мамлакатда COVID-19 га чалиниш ҳолатлари тинимсиз рекорд ўрнатмоқда.
Изоҳ (0)