Armanistonda prezidentlik saylovlari 2022-yilning mart oyida bo‘lib o‘tadi. Mamlakat parlamentining 65 nafar deputati ushbu lavozimga yuqori texnologiyalar sanoati vaziri Vaagn Xachatryan nomzodini ilgari surgan. Bu haqda bosh vazir Nikol Pashinyan hukumat yig‘ilishida ma’lum qildi, deb xabar beradi “Interfaks”.
Armen Sarkisyan iste’foga chiqishini 23-yanvar kuni e’lon qilgandi, parlament 1-fevral kuni uning qarorini tasdiqlagan. U davlat rahbarligidan ketayotganini mamlakat siyosati, urush va tinchlik masalalariga ta’sir o‘tkaza olmayotgani bilan izohlagan. Prezidentning majburiyatlarini vaqtincha Milliy yig‘in spikeri Alen Simonyan bajarib turibdi.
Armaniston prezidenti parlament tomonidan yetti yil muddatga saylanadi. Saylov respublika prezidenti lavozimi vakant bo‘lgan kundan boshlab kamida 25 kundan keyin va 35 kundan kechiktirilmagan holda o‘tkaziladi.
Vaagn Xachaturyan Armanistonni 1991—1998-yilalrda boshqargan Levon Ter-Petrosyan siyosiy ittifoqchisi hisoblanadi.
Xachaturyan 1992—1992-yillarda Yerevan meri, 1996—1998-yillarda prezident maslahatchisi bo‘lgan. 2019-yildan 2021-yilga qadar armanistonlik yirik tadbirkor, hukmron partiyadan parlamentga deputat sifatida saylangan Xachatur Sukiasyanning oilasiga tegishli “Armekonbank” boshqaruv a’zosi bo‘lgan. 2021-yilning avgustida Xachaturyan yuqori texnologiyalar sanoati vaziri etib tayinlangandi.
Avvalroq “Porloq Armaniston” partiyasi rahbari Edmon Marukyan va tashqi ishlar vaziri Ararat Mirzoyan Armaniston prezidentligi lavozimiga da’vogarlik qilishi mumkinligi to‘g‘risida xabar berilgandi. “Armaniston” muxolifat fraksiyasidan bo‘lgan parlament deputati Andranik Tevanyan Sarkisyan respublikadan chiqib ketganini ma’lum qilgan. Qator arman OAVlari u Londonda ekanini yozmoqda.
Izoh (0)