G‘arbiy Afrikada joylashgan Gvineya-Bisauda davlat to‘ntarishiga urinish muvaffaqiyatsiz kechdi. Tartibsizliklar oqibatida kamida 11 kishi halok bo‘lgan. Bu haqda mamlakatning turizm vaziri va hukumat vakili Fernando Vash matbuot anjumanida ma’lum qildi.
Vazirning so‘zlariga ko‘ra, mamlakat poytaxti Bisaudagi hodisa qurbonlari orasida tinch aholi, askarlar va xavfsizlik kuchlarining xodimlari ham bor. U davlat to‘ntarishi ishtirokchilarini “mamlakatda tartibsizlik yaratishga” uringanlikda qoralab, rasmiylar tomonidan har tomonlama tekshiruv o‘tkazilishiga va’da berdi.
Shuningdek, Vash mudofaa va xavfsizlik kuchlari konstitutsiyaviy tuzumni qo‘llab-quvvatlash uchun jasorat va qat’iyat ko‘rsatib, to‘ntarishni to‘xtatishda muhim rol o‘ynaganini alohida tilga oldi.
Gvineya-Bisau 3-fevral kuni prezident Umar Shisoku Embalo va bosh vazir Nuno Nabiama ishtirokida uchrashuv bo‘lib o‘tayotgan paytda hukumat binosi yaqinida kuchli otishma ovozlari eshitilgan.
Keyinchalik Embalo matbuot anjumanida davlat to‘ntarishiga urinish uning giyohvand moddalar savdosiga qarshi kurashi bilan bog‘liqligini, bir necha kishi hibsga olinganini aytgan.
Yanvar oxirida Afrikaning yana bir davlati Burkina-Fasoda davlat to‘ntarishi sodir bo‘lgandi. Mamlakat prezidenti Rok Mark Kabore harbiylar tomonidan hibsga olingan va armiya bazalaridan biriga joylashtirilgan. Uning oilasi mamlakatni tark etgan.
Mavzuga doir:
Izoh (0)