Andijonda savdo majmuasidagi 10 ta do‘konni 117 ming dollarga sotishga uringan tadbirkor ushlandi

Davlat xavfsizlik xizmatining Andijon, Jizzax, Samarqand va Xorazm viloyatlari bo‘yicha boshqarmalari xodimlari tomonidan boshqa huquq-tartibot idoralari xodimlarini jalb etgan holda noqonuniy yer sotish bilan bog‘liq bir nechta holatga chek qo‘yildi.

Xususan, Andijon shahridagi mas’uliyati cheklangan jamiyatlardan birining rahbari o‘zganing ishonchiga kirib, unga 6 gektar maydonda 240 ta do‘kondan iborat bo‘lgan savdo kompleksining qurilish ishlari o‘zi rahbarlik qilayotgan MChJ tomonidan amalga oshirilayotganini aytgan.

U 10 ta savdo do‘konini sotishini hamda mansabdor tanishlari orqali do‘konlarning kadastr hujjatlarini va shahar hokimining tegishli qarorini chiqartirib berishni va’da qilib, buning evaziga 117 ming dollar so‘ragan va oldindan 60 ming dollar olgan vaqtida ushlangan.

Jizzax viloyatida kuzatilgan holatda esa Zomin tumanida yashovchi fuqaro (1987-yilda tug‘ilgan) yer maydonlarini sotishga vakolati bo‘lmasa-da, o‘zganing nomida bo‘lgan fermer xo‘jaligining 50 gektar lalmi yer maydonini viloyat hokimligi va kadastr tizimidagi tanishlari orqali rasmiylashtirib berish evaziga xaridordan 250 million so‘m olgan vaqtida qo‘lga olingan.

Xorazm viloyatida qayd etilgan holatda Hazorasp tumanida yashovchi fuqaro (1959-yilda tug‘ilgan) aldov yo‘li bilan o‘zganing ishonchiga kirib, aslida tuman hokimligi zaxirasida bo‘lgan 6 sotix yerni go‘yoki o‘ziniki ekanini aytib, ushbu yer uchastkasini unga 10,5 ming dollarga sotgan vaqtida ashyoviy dalillar bilan ushlangan.

Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.

Avvalroq Samarqandda o‘rmon xo‘jaligiga tegishli 4 gektar yerni 30 ming dollarga sotishga uringan advokat ushlangani, Toshkent viloyatida ijaradagi 30 sotix yerni qariyb 340 mln so‘mga sotgan shaxslar qo‘lga olingani, Samarqandda 0,25 gektar yerni 24 ming dollarga sotishga uringan Kadastr agentligi xodimi va uning sherigi ushlangani to‘g‘risida xabar berilgandi.