Андижонда савдо мажмуасидаги 10 та дўконни 117 минг долларга сотишга уринган тадбиркор ушланди

Давлат хавфсизлик хизматининг Андижон, Жиззах, Самарқанд ва Хоразм вилоятлари бўйича бошқармалари ходимлари томонидан бошқа ҳуқуқ-тартибот идоралари ходимларини жалб этган ҳолда ноқонуний ер сотиш билан боғлиқ бир нечта ҳолатга чек қўйилди.

Хусусан, Андижон шаҳридаги масъулияти чекланган жамиятлардан бирининг раҳбари ўзганинг ишончига кириб, унга 6 гектар майдонда 240 та дўкондан иборат бўлган савдо комплексининг қурилиш ишлари ўзи раҳбарлик қилаётган МЧЖ томонидан амалга оширилаётганини айтган.

У 10 та савдо дўконини сотишини ҳамда мансабдор танишлари орқали дўконларнинг кадастр ҳужжатларини ва шаҳар ҳокимининг тегишли қарорини чиқартириб беришни ваъда қилиб, бунинг эвазига 117 минг доллар сўраган ва олдиндан 60 минг доллар олган вақтида ушланган.

Жиззах вилоятида кузатилган ҳолатда эса Зомин туманида яшовчи фуқаро (1987 йилда туғилган) ер майдонларини сотишга ваколати бўлмаса-да, ўзганинг номида бўлган фермер хўжалигининг 50 гектар лалми ер майдонини вилоят ҳокимлиги ва кадастр тизимидаги танишлари орқали расмийлаштириб бериш эвазига харидордан 250 миллион сўм олган вақтида қўлга олинган.

Хоразм вилоятида қайд этилган ҳолатда Ҳазорасп туманида яшовчи фуқаро (1959 йилда туғилган) алдов йўли билан ўзганинг ишончига кириб, аслида туман ҳокимлиги захирасида бўлган 6 сотих ерни гўёки ўзиники эканини айтиб, ушбу ер участкасини унга 10,5 минг долларга сотган вақтида ашёвий далиллар билан ушланган.

Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ Самарқандда ўрмон хўжалигига тегишли 4 гектар ерни 30 минг долларга сотишга уринган адвокат ушлангани, Тошкент вилоятида ижарадаги 30 сотих ерни қарийб 340 млн сўмга сотган шахслар қўлга олингани, Самарқандда 0,25 гектар ерни 24 минг долларга сотишга уринган Кадастр агентлиги ходими ва унинг шериги ушлангани тўғрисида хабар берилганди.