Toshkent shahrida tadbirkorning ishonchiga kirib, uni 15 ming dollarga chuv tushirgan shaxsga jinoyat ishi qo‘zg‘atildi, deb xabar beradi Bosh prokuratura huzuridagi Departament.
Ma’lum qilinishicha, Departamentning Sergeli tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruv davomida T.S. ismli shaxs “B.M.” MChJ rahbari F.ning ishonchiga kirib, Yangihayot tumanidan 2,5 sotixli uy-joyni ofis uchun olib berishni va’da qilgani aniqlangan. Buning evaziga u fuqaro F.dan 15 ming dollarni firibgarlik yo‘li bilan qo‘lga kiritib, o‘z ehtiyojlariga sarflab yuborgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Qashqadaryoda o‘zini prokuratura xodimi deb tanishtirib, odamlarni chuv tushirgan sobiq IIB xodimi va uning sherigi qo‘lga olingani, Andijonda o‘zini Ispaniya banki vakili deya tanishtirib, 200 ming dollar kredit olib berish uchun pul talab qilgan shaxs ushlangani to‘g‘risida xabar berilgandi.
