O‘zbekiston ayrim hududlarida elektr ta’minotining tiklanguniga qadar Ichki ishlar vazirligining barcha xizmatlari, shu jumladan, Yo‘l harakati xavfsizligi tizimi jamoat tartibini saqlashga, yo‘llarda tartibni ta’minlashga jalb etilgan. Bu haqda vazirlik matbuot xizmati xabar berdi.
Idoraning ma’lum qilishicha, fuqarolar va ularning mulklarini xavfsizligi to‘liq ta’minlanishi nazoratga olingan. 102 tizimi odatiy rejimda ishlamoqda.
“Fuqarolardan noodatiy vaziyatdan sarosimaga tushmasliklarini hamda tushunmovchiliklar yuzaga kelganda ichki ishlar organlari va maxsus xizmatlarning yordamiga tayanishlarini so‘raymiz. Ko‘cha va yo‘llarda ichki ishlar organlari xodimlarining qonuniy talablarini bajarishingizni, yo‘l harakati qoidalariga so‘zsiz rioya qilishingizni, maxsus transport vositalariga yo‘l berishingizni, imkon tariqasida avtotransport vositalaridan foydalanmasligingizni so‘raymiz”, — deyiladi xabarda.
25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Mamlakat aeroportlari faoliyati elektr energiyasi yo‘qligi sababli vaqtincha to‘xtatilgan, Toshkent metropoliteni faoliyati ham to‘xtagan, Respublikadagi barcha poyezdlar o‘z manzillariga kechikib yetib borishi aytilmoqda. Toshkent shahar IIBB esa tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilmoqda.
Energetika vazirligining ma’lum qilishicha, Qozog‘iston Elektr tarmog‘ida katta avariya bo‘lishi oqibatida Olmaota, Chimkent, Taras, Turkiston (viloyatlarida) va atrof hududlarida Elektr energiya ta’minotida o‘chishlar yuzaga kelgan. Vazirlik ma’lumotlariga ko‘ra, hozirda Toshkent viloyatidagi Chorvoq, Xojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan.
Izoh (0)