Ўзбекистон айрим ҳудудларида электр таъминотининг тиклангунига қадар Ички ишлар вазирлигининг барча хизматлари, шу жумладан, Йўл ҳаракати хавфсизлиги тизими жамоат тартибини сақлашга, йўлларда тартибни таъминлашга жалб этилган. Бу ҳақда вазирлик матбуот хизмати хабар берди.
Идоранинг маълум қилишича, фуқаролар ва уларнинг мулкларини хавфсизлиги тўлиқ таъминланиши назоратга олинган. 102 тизими одатий режимда ишламоқда.
«Фуқаролардан ноодатий вазиятдан саросимага тушмасликларини ҳамда тушунмовчиликлар юзага келганда ички ишлар органлари ва махсус хизматларнинг ёрдамига таянишларини сўраймиз. Кўча ва йўлларда ички ишлар органлари ходимларининг қонуний талабларини бажаришингизни, йўл ҳаракати қоидаларига сўзсиз риоя қилишингизни, махсус транспорт воситаларига йўл беришингизни, имкон тариқасида автотранспорт воситаларидан фойдаланмаслигингизни сўраймиз», — дейилади хабарда.
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Мамлакат аэропортлари фаолияти электр энергияси йўқлиги сабабли вақтинча тўхтатилган, Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлигининг маълум қилишича, Қозоғистон Электр тармоғида катта авария бўлиши оқибатида Олмаота, Чимкент, Тарас, Туркистон (вилоятларида) ва атроф ҳудудларида Электр энергия таъминотида ўчишлар юзага келган. Вазирлик маълумотларига кўра, ҳозирда Тошкент вилоятидаги Чорвоқ, Хожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган.
Изоҳ (0)