Toshkent tibbiyot akademiyasining 2-klinikasida jarrohlik amaliyotlari 15 soatga to‘xtatilgani aytilmoqda.
“Daryo” muxbiri Toshkent tibbiyot akademiyasining 2-klinikasida bo‘lib, shifoxonada davolanayotgan bemorlarning ahvoli qay daraja ekani, ularga suniy nafas berish apparatlari qanday ishlayotgani haqida bo‘lim mudiri Sardor Eshonqulovdan izoh berishi so‘radi. Bo‘lim mudiri ma’lumot berishga rahbariyatdan ruxsat yo‘qligini aytib, so‘rovni rad etdi.
O‘z ismini oshkor qilishni istamagan klinika shifokorining aytishicha, jarrohlik operatsiyalari 15 soatga to‘xtatilishi haqida topshiriq kelgan. O‘ta og‘ir opretsiyalar uchun xona tayyorlab qo‘yish aytilgan.
Avvalroq Sog‘liqni saqlash vazirligi matbuot kotibi Furqat Sanayev “Daryo”ga bergan qisqacha intervyusida xavotirga o‘rin yo‘qligi, “svet” o‘chgani shifoxonalardagi operatsiya jarayonlariga xavf tug‘dirmasligini aytib o‘tgan edi.
Energetika vazirligining ma’lum qilishicha, Qozog‘iston Elektr tarmog‘ida katta avariya bo‘lishi oqibatida Olmaota, Chimkent, Taras, Turkiston (viloyatlarida) va atrof hududlarida elektr energiya ta’minotida o‘chishlar yuzaga kelgan. Vazirlik ma’lumotlariga ko‘ra, hozirda Toshkent viloyatidagi Chorvoq, Xojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan.
Izoh (0)