O‘zbekiston Superligasi 18-turi doirasidagi so‘nggi ikki uchrashuv yakuniga yetdi. Qarshidagi “Markaziy” stadion “Buxoro” — “Xorazm” bahsiga mezbonlik qilgan bo‘lsa, “Surxon” Termizda “Bunyodkor”ni qabul qildi.
Qarshida o‘tgan “Buxoro” — “Xorazm” uchrashuvi 1:1 hisobidagi durang bilan yakunlandi. Bahsning 55-daqiqasida urganchliklar hujumchisi Shahram Samiyev hisobni ochdi. Tojikistonlik futbolchi mezbonlar darvozasini ishg‘ol qilib, jamoasini oldinga olib chiqdi. Ammo o‘yin so‘ngida “Buxoro”ning bosniyalik legioneri Dominik Begich javob golini urib, jamoasini mag‘lubiyatdan qutqarib qoldi.
Natijada jamoalar 1 ochkodan bo‘lishib oldi. 19 ochko jamg‘argan “Xorazm” turnir jadvalida 12-o‘rinni egallab turgan bo‘lsa, “Buxoro” 14 ochko bilan 15-pog‘onada bormoqda.
Kunning ikkinchi o‘yinida “Surxon” o‘z maydonida “Bunyodkor”ni qabul qilib, 3:1 hisobida zafar quchdi. Termizliklarning o‘yindagi hisobni 17-daqiqada Rustam Turdimurodovning goli evaziga ochdi. 34-daqiqada Asilbek Jumayev farqni ikkitaga oshirib qo‘ygan bo‘lsa, 73-daqiqada esa Turdimurodov o‘zining o‘yindagi ikkinchi golini urib, hisobni yirik ko‘rinishga keltirib qo‘ydi. O‘yin yakuni arafasida Isuki Urata “Bunyodkor”ning yagona javob goliga mualliflik qildi.
Ushbu g‘alabadan so‘ng “Surxon” ochkolar sonini 23 taga yetkazib, 8-o‘ringa ko‘tarildi. “Bunyodkor” esa 31 ochko bilan 6-pog‘onani egallab turibdi.
O‘zbekiston Superligasi
18-tur
13-avgust, chorshanba
“Buxoro” — “Xorazm” 1:1
Gollar: 0:1 — Samiyev (55), 1:1 — Begich (90).
“Surxon” — “Bunyodkor” 3:1
Gollar: 1:0 — Turdimurodov (17), 2:0 — Jumayev (34), 3:0 — Turdimurodov (73), 3:1 — Urata (90).
Izoh (0)