Toshkent shahrining barcha hududlarida elektr energiyasi o‘chgani sababli Toshkent metropolitenining barcha yo‘nalishlarida vaqtinchalik metro harakati to‘xtadi. Bu haqda metropoliten matbuot xizmati xabar berdi.
Ma’lum qilinishicha, nosozlik bartaf etilganidan so‘ng, Toshkent metropoliten yo‘lovchilarga doimiy jadval asosida xizmat ko‘rsatishni davom ettiradi.
Shuningdek, “O‘zbekiston temir yo‘llari”ning ma’lumotlariga ko‘ra, respublikada keng qamrovli elektr energiyasi ta’minoti uzilgani bois ayrim yo‘lovchi poyezdlarning o‘z manzillariga yetib borish kechikmoqda.
“Toshshahartransxizmat”ning ma’lum qilishicha, Toshkent shahrida elektroenergiya ta'minotida uzilishlar kuzatilayotgani sababli avtobuslarning harakatini kuzatib borish uchun mo‘ljallangan mobil ilovalarga ma’lumotlar uzatilishida uzilishlar bo‘lishi mumkin.
Avvalroq 25-yanvar kuni soat 11:00 larda Toshkentning ko‘plab tumanlarida elektr energiyasi ta’minoti uzilgani to‘g‘risida xabar berilgandi. Ma’lumotlarga ko‘ra, elektr energiyasi Yunusobod, Chilonzor, Olmazor, Yashnobod, Bektemir, Mirobod, Shayxontohur va boshqa qator tumanlarda o‘chgan. Shuningdek, elektr energiyasi ta’minoti bilan bog‘liq muammolar nafaqat Toshkent shahrida, balki Chirchiq, Namangan, Samarqand, Jizzax va Qo‘qon shaharlari ham kuzatilmoqda.
Energetika vazirligining ma’lum qilishicha, Qozog‘iston Elektr tarmog‘ida katta avariya bo‘lishi oqibatida Olmaota, Chimkent, Taras, Turkiston (viloyatlarida) va atrof hududlarida Elektr energiya ta’minotida o‘chishlar yuzaga kelgan. Toshkent shahar IIBB esa tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilmoqda.
Izoh (0)