Elektr energiyasi tarmoqlarida yuzaga kelgan uzulishlar sababli ko‘p kvartirali uylardagi liftlar to‘xtab qolgan. Bu haqda FVV matbuot xizmati xabar berdi.
Ta’kidlanishicha, qutqaruvchilar tomonidan hozirgacha 10 dan ortiq fuqaro liftdan chiqarib olingan. Ayni vaqtda FVV qutqaruvchilari joylarda zaruriy tadbirlarni amalga oshirmoqda.
Shuningdek, Elektr energiyasi tarmoqlarida yuzaga kelgan uzulishlar sababli Bo‘stonliq tumani Chimyon va Beldirsoy tog‘ dor yo‘llari to‘xtab qolgan. Qutqaruvchilar tomonidan Chimyon tog‘ dor yo‘lidan 20 nafar va Beldirsoy tog‘ dor yo‘lidan 60 nafar, jami 80 nafar fuqaro xavfsiz joyga olib tushilgan. “Amirsoy” tog‘-chang‘i kurortida esa elektr energiyasi ta’minoti o‘chganidan 10 daqiqa o‘tib, qayta tiklangan. U yerga qutqaruvchilarning yordami talab etilmagani aytilmoqda.
Energetika vazirligining ma’lum qilishicha, Qozog‘iston Elektr tarmog‘ida katta avariya bo‘lishi oqibatida Olmaota, Chimkent, Taras, Turkiston (viloyatlarida) va atrof hududlarida elektr energiya ta’minotida o‘chishlar yuzaga kelgan. Vazirlik ma’lumotlariga ko‘ra, hozirda Toshkent viloyatidagi Chorvoq, Xojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan.
Izoh (0)