Chexiyaning Vlashim shahrida istiqomat qiluvchi fuqaro qasddan koronavirus infeksiyasini tarqatishda ayblanmoqda va u uch yilga ozodlikdan mahrum etilishi mumkin. Bu haqda huquq-tartibot organlariga tayanib, Blesk gazetasi xabar berdi.
Ta’kidlanishicha, 2021-yilning noyabrida 43 yoshli erkakning koronavirusga topshirgan testi ijobiy chiqqach, unga uy sharoitida o‘zini o‘zi yakkalash buyurilgan.
Shunga qaramay, bemor jamoat joylariga niqob yoki respiratorsiz tashrif buyurgan. Xususan, u himoya vositalarisiz qarindoshlarining uyiga borgan. U yerda yong‘in yuzaga kelgach, favqulodda holat joyida ishlagan 80 ga yaqin o‘t o‘chiruvchi, politsiyachi va tibbiyot xodimlarini kasallik yuqishi xavfi ostida qoldirgan.
Politsiyaning aniqlashicha, erkak jami 100 ga yaqin odam bilan aloqada bo‘lgan, ularning qanchasiga COVID-19 yuqqani noma’lum.
Qonunbuzarga nisbatan jinoyat ishi qo‘zg‘atilgan.
Avvalroq Belgiya va Chexiyada minglab odamlar aholini majburiy vaksinatsiya qilish va cheklov choralariga qarshi norozilik bildirish maqsadida ko‘chalarga chiqqani to‘g‘risida xabar berilgandi. Andrey Babish boshchiligidagi oldingi hukumat Chexiyaning 60 yoshdan katta bo‘lgan barcha fuqarosini COVID-19 ga qarshi majburiy emlash bo‘yicha qaror qabul qilgan. U martdan boshlab kuchga kiradi. Pyotr Fiala rahbarligidagi yangi Vazirlar Mahkamasi majburiy vaksinatsiya bo‘yicha hozircha yakuniy qaror qabul qilmagan.
Izoh (0)