Калифорния штати прокурорлари Tesla Model S эгасига нисбатан 2019 йилда ўлим билан якунланган авария сабаб айблов эълон қилди, деб хабар беради Associated Press. Таъкидланишича, мазкур ЙТҲлар вақтида электрокарда автопилот тизими ҳам ишлаётган бўлган.
Округ прокурорининг маълумотларига кўра, кўнгилсиз ҳодиса Лос-Анжелес яқинида содир бўлган. Катта йўлда ҳаракатланаётган 27 ёшли эркак светофорнинг қизил чироғида ўтиб кетиб, Honda Civic’га урилган ва оқибатда икки киши ҳалок бўлган. Машина эгаси ўлим билан якунланган йўл-транспорт ҳодисаси иши бўйича айбланмоқда. Суд жараёнига қадар у гаров эвазига озод қилинган, ҳозирча иш кўриб чиқилмоқда.
Суднинг расмий ҳужжатларида электрокарнинг автопилоти функцияси қайд этилмаган. Шу билан бирга, аварияни тергов қилиш бўйича жамоа шакллантирган АҚШ Йўл ҳаракати хавфсизлиги миллий администрацияси (NHTSA) ЙТҲ вақтида автопилот фаол ҳолатда бўлганини тасдиқлаган. Яқин келажакда идора суриштирув натижаларини эълон қилишни режалаштирмоқда.
«NHTSA ҳозирги кунда сотувда бўлган бирорта транспорт воситаси тўлиқ ‘мустақил бошқарилиш’ ҳуқуқига эга эмаслигини эслатиб ўтади. Автопилот фаол ёки фаол эмаслигидан қатъий назар, ҳайдовчи йўлдаги вазиятни назорат қилиш ва унга қараб кетишга мажбур. Штат қонунларига кўра, шунингдек, у автоматлаштирилган тизимлар ёрдамида бошқарилган ҳолатларнинг оқибати учун ҳам жавоб беради», — дейилади NHTSA баёнотида.
Мавзуга доир:
Шунингдек, Шимолий Каролина штатида автопилотда ҳаракатланаётган Tesla Model S иккита полиция автомобили билан тўқнашув содир этгани ҳамда Tesla Model 3 нинг рули ҳаракат вақтида узилиб тушгани, Хитойда Tesla автопилоти соатига 127 километр тезликда ҳаракатланиб, ЙТҲга учрагани тўғрисида хабар берилганди.
Изоҳ (0)