AQShning ikki nafar senatori yaqinda Tesla elektromobillari bilan sodir bo‘lgan YTHdan keyin, Yo‘l harakati xavfsizligi milliy boshqarmasini (National Highway Traffic Safety Administration, NHTSA) haydovchilarga yordam berish tizimlarining sifatini yaxshilash maqsadida avtomobil ishlab chiqaruvchilar uchun tavsiyalar ishlab chiqishga chaqirdi, deb yozmoqda The Wall Street Journal.
Foto: Getty Images
“Ushbu transport vositalari bilan bog‘liq xavfsizlik muammolari odatiy holga aylanib borayotganidan xavotirdamiz. Bu hol odamni jiddiy tashvishga soladi va e’tibor qaratishingizga loyiq masala hisoblanadi”, — dedi demokrat senatorlar Richard Blumental va Ed Marki NHTSA’ga yo‘llagan murojaatida.
20-aprel kuni NHTSA 19-aprelda sodir bo‘lgan halokatli YTHni tekshirishni boshladi. Umumiy hisobda nazoratchilar Tesla avtomobillari bilan bog‘liq bo‘lgan yigirmadan ortiq baxtsiz hodisalarni tekshirdi va ularning aksariyati haydovchilarga yordam berish tizimidan foydalanish bilan bog‘liqligi aniqlandi.
Avvalroq Texas shtatining Vudlends shahrida 2019-yilda ishlab chiqarilgan Tesla Model S avtomobili daraxtga urilib, yonib ketishi oqibatida mashina ichidagi ikki kishi halok bo‘lgan edi. Politsiya ma’lumotlariga ko‘ra, mashina avtopilot rejimida bo‘lgan.
Lekin Tesla kompaniyasining rahbari Ilon Mask YTHga uchragan avtomobilning avtopilot rejimida bo‘lmaganini ta’kidladi.
Avtohalokatdan bir necha soat oldin Ilon Mask Twitter’da Teslaning avtopiloti haqida post qoldirdi. “Avtopilot o‘rnatilgan Tesla’da avtohalokatga uchrash ehtimoli o‘rtacha avtomobillardan 10 baravar kam”, — deb yozgan Tesla bosh direktori.
Tesla avtopilot rejimi haydovchining o‘rnini bosa olmasligini hamda funksiyadan foydalanishda yo‘lni kuzatish va vaziyatni boshqarish kerakligini bir necha bor ta’kidlagan. “Avtopilot va to‘liq o‘zini o‘zi boshqarish funksiyasi qo‘llarini avtomobil rulidan olmaydigan va istalgan vaqtda boshqaruvni o‘z zimmasiga olishga tayyor bo‘lgan haydovchining doimiy nazorati ostida foydalanilishi kerak”, — deyiladi kompaniya saytida.
Shuningdek, Xitoyning Guanchjou shahrida Tesla avtomobili jiddiy YTHga uchradi. YTH oqibatida elektromobilning akkumulyatori yonib ketgan. Bir necha daqiqada olov butun mashinani qamrab olgan va natijada undan faqat karkas qolgan.
Bundan tashqari, Shimoliy Karolina shtatida avtopilotda harakatlanayotgan Tesla Model S ikkita politsiya avtomobili bilan to‘qnashuv sodir etgani, yana bir Tesla Model 3’ning ruli harakat vaqtida uzilib tushgani, Xitoyda Tesla avtopiloti soatiga 127 kilometr tezlikda harakatlanib, YTHga uchragani to‘g‘risida xabar berilgan edi.
