Madagaskarda kuchli yomg‘ir suv toshqini va ko‘chkilarni keltirib chiqardi, kamida 10 kishi halok bo‘ldi. Bu haqda Floot List xabar berdi.
Poytaxt Antananarivuda bir kun ichida 75 millimetrdan ortiq yog‘ingarchilik qayd etilgan. Sisaoni daryosining sathi yarim soat ichida 68 santimetrga ko‘tarilgan.
Uylar va ko‘priklar qulab tushdi, infratuzilmaga zarar yetdi, qishloq xo‘jaligi yerlari suv ostida qoldi. O‘n kishi halok bo‘ldi, yana ikki kishi yaralandi, 500 ga yaqin odam evakuatsiya qilindi, deyiladi xabarda.
Madagaskar Suv xo‘jaligi vazirligi mamlakatda xavfning “qizil” darajasini e’lon qildi.
Avvalroq Fransiya janubi-g‘arbida kuchli yomg‘irlar oqibatida katta suv toshqinlari kuzatilgandi, tabiiy ofat oqibatida bir nafar ayol halok bo‘lgan.
Shuningdek, Eronda yirik suv toshqinlari oqibatida 8 kishi halok bo‘lgani, Braziliyada suv toshqinlari tufayli 100 ta shaharda favqulodda holat e’lon qilingani, Malayziyada yirik suv toshqinlari yuz berib, 25 mingdan ortiq odam evakuatsiya qilingani haqida xabarlar berilgan.
Izoh (0)