Kanada sudi vaksina olishni istamagan otaga o‘g‘li bilan ko‘rishishni taqiqladi

Kanadaning Kvebek shahar Oliy sudi koronavirus vaksinasini olishga qarshi bo‘lgan otaga 12 yoshli o‘g‘li bilan ko‘rishishni vaqtinchalik taqiqladi. Tarixda birinchi marta sudlanuvchini COVID-19 ga qarshi emlanmagani sabab bolasining oldiga qo‘ymaslik to‘g‘risida qaror qabul qilindi, deb yozadi Le Devoir.

Sud qarori 23-dekabrda qabul qilingan, taqiq fevral oyining boshigacha amal qiladi.

Ushbu qarorni qabul qilish chog‘ida sudya Jan-Sebastyen Vayyankur normal vaziyatda otasi bilan uchrashish bolaning manfaatlariga mos kelishini, ammo hozirgi epidemiologik sharoitda sanitariya choralariga qarshi va emlanmagan odam bilan muloqot qilish mumkin emasligini ta’kidlagan.

12 yoshli bola koronavirusga qarshi vaksinaning ikki dozasini olgan, lekin bu himoya omikron shtammi tarqalayotgan vaziyatda yetarli bo‘lmasligi mumkin, deydi sudya. Sudda bolaning otasi vaksinatsiyaga nisbatan ehtiyotkor munosabatdaligi, emlanmagan bo‘lsa-da uydan deyarli chiqmay, zarur choralarga rioya qilayotganini aytgan. Sudyaning ta’kidlashicha, erkak vaksinatsiyaga bo‘lgan munosabatini isbotlamagan.

Ushbu oilada o‘g‘il onasi bilan yashaydi, otasi har ikki haftada bir dam olish kunlarida, bayramlar vaqtida bir haftada bir o‘g‘li bilan ko‘rishish huquqiga ega. Sud jarayonining boshlanishiga dekabr oyi o‘rtalarida otaning suddan o‘g‘li bilan dam olish kunlarida qo‘shimcha yana bir kun ko‘rishishga ruxsat so‘ragani sabab bo‘lgan.

Biroq bolaning onasi bunga qarshi chiqqan va suddan erkakning COVID-19 ga qarshi emlanmagani, antivaksinachi va fitna nazariyotchisi ekani sabab o‘g‘li bilan uchrashish huquqidan vaqtincha mahrum qilishni so‘ragan, deb yozadi Le Devoir. U sudga erkakning Facebook’idan buni tasdiqlovchi skrinshotlarni taqdim etgan. Da’vosi rad etilgan taqdirda ayol suddan ota-bolaning ko‘rishishi avvalgi shartlar asosida saqlanib qolishini so‘ragan.

Ayolning advokati Pyer-Oliviye Martel bolaning otasi emlanmagani juda xavotirli ekani, chunki bola emlangan bo‘lsa-da, maktabda va do‘stlari bilan ko‘p vaqt o‘tkazishini aytdi.

Onaning boshqa nikohdan yana ikki nafar kichik farzandi borligi, ular vaksina olish yoshiga yetmagani sudya uchun hal qiluvchi omil bo‘ldi. Sudya har uchala farzandning manfaatini ko‘zlab qaror chiqargan. Taqiq muddatining qisqaligi epidemiologik vaziyatning tez o‘zgarishi bilan izohlandi. Sudya fevral oyida ishni qayta ko‘rib chiqishga va’da berdi.