Канаданинг Квебек шаҳар Олий суди коронавирус вакцинасини олишга қарши бўлган отага 12 ёшли ўғли билан кўришишни вақтинчалик тақиқлади. Тарихда биринчи марта судланувчини COVID-19 га қарши эмланмагани сабаб боласининг олдига қўймаслик тўғрисида қарор қабул қилинди, деб ёзади Le Devoir.
Суд қарори 23 декабрда қабул қилинган, тақиқ февраль ойининг бошигача амал қилади.
Ушбу қарорни қабул қилиш чоғида судья Жан-Себастен Вайянкур нормал вазиятда отаси билан учрашиш боланинг манфаатларига мос келишини, аммо ҳозирги эпидемиологик шароитда санитария чораларига қарши ва эмланмаган одам билан мулоқот қилиш мумкин эмаслигини таъкидлаган.
12 ёшли бола коронавирусга қарши вакцинанинг икки дозасини олган, лекин бу ҳимоя омикрон штамми тарқалаётган вазиятда етарли бўлмаслиги мумкин, дейди судья. Судда боланинг отаси вакцинацияга нисбатан эҳтиёткор муносабатдалиги, эмланмаган бўлса-да уйдан деярли чиқмай, зарур чораларга риоя қилаётганини айтган. Судьянинг таъкидлашича, эркак вакцинацияга бўлган муносабатини исботламаган.
Ушбу оилада ўғил онаси билан яшайди, отаси ҳар икки ҳафтада бир дам олиш кунларида, байрамлар вақтида бир ҳафтада бир ўғли билан кўришиш ҳуқуқига эга. Суд жараёнининг бошланишига декабрь ойи ўрталарида отанинг суддан ўғли билан дам олиш кунларида қўшимча яна бир кун кўришишга рухсат сўрагани сабаб бўлган.
Бироқ боланинг онаси бунга қарши чиққан ва суддан эркакнинг COVID-19 га қарши эмланмагани, антивакциначи ва фитна назариётчиси экани сабаб ўғли билан учрашиш ҳуқуқидан вақтинча маҳрум қилишни сўраган, деб ёзади Le Devoir. У судга эркакнинг Facebook’идан буни тасдиқловчи скриншотларни тақдим этган. Даъвоси рад этилган тақдирда аёл суддан ота-боланинг кўришиши аввалги шартлар асосида сақланиб қолишини сўраган.
Аёлнинг адвокати Пьер-Оливие Мартел боланинг отаси эмланмагани жуда хавотирли экани, чунки бола эмланган бўлса-да, мактабда ва дўстлари билан кўп вақт ўтказишини айтди.
Онанинг бошқа никоҳдан яна икки нафар кичик фарзанди борлиги, улар вакцина олиш ёшига етмагани судья учун ҳал қилувчи омил бўлди. Судья ҳар учала фарзанднинг манфаатини кўзлаб қарор чиқарган. Тақиқ муддатининг қисқалиги эпидемиологик вазиятнинг тез ўзгариши билан изоҳланди. Судья февраль ойида ишни қайта кўриб чиқишга ваъда берди.
Мавзуга доир:
Изоҳ (0)