Indoneziyaning markaziy Sulavesi provinsiyasida 17-avgust kuni 6 magnitudali kuchli zilzila sodir bo‘ldi. Dastlabki ma’lumotlarga ko‘ra, tabiiy ofat tufayli kamida 29 kishi jarohatlandi. Bu haqda The Independent xabar berdi.
Favqulodda vaziyatlar agentligiga ko‘ra, zilzila epitsentri 1 kilometr chuqurlikda joylashgani sababli zarba kuchli bo‘lgan. Ikki kishi og‘ir ahvolda bo‘lib, kasalxonaga yotqizilgan. Sulavesi provinsiyasidagi bir cherkov vayron bo‘lgan, yana bir cherkovning ta’mirlanayotgan qismi qulab tushib, bir necha odamni bosib qolgan.
Poso shahridan olingan videolarda zilzila chog‘ida cherkov jamoasi ibodat qilayotgan paytda silkinish boshlangani, odamlar vahimada chiqib ketishga uringani aks etgan. FVVga ko‘ra, hozircha o‘lim holatlari haqida xabar qilinmagan. Sunami xavfi ham e’lon qilinmagan.
Ma’lumot o‘rnida, Indoneziya seysmik jihatdan faol “Tinch okeani olov halqasi” hududida joylashgani sababli mamlakatda tez-tez zilzila va vulqon otilishi sodir bo‘lib turadi. Xususan, 2022-yilda G‘arbiy Yavadagi 5,6 magnitudali zilzilada 600 dan ortiq kishi halok bo‘lib, 7 mingdan ziyod odam jarohatlangan va o‘n minglab uylar vayron bo‘lgandi.
Izoh (0)