Qozog‘istonning birinchi prezidenti, millat yetakchisi Nursulton Nazarboyevning kenja qizi Aliya Nazarboyeva otasini ma’naviy qo‘llab-quvvatlagani uchun yurtdoshlariga minnatdorlik bildirdi. Uning so‘zlariga ko‘ra, shu kunlarda qozog‘istonliklardan ko‘plab xatlar kelmoqda.
“Sizdan kelayotgan ruhlantiruvchi so‘zlar uchun rahmat. Otamni ma’naviy qo‘llab-quvvatlayotganingizdan minnatdorman, u bugungi kunda turli viloyatlar aholisidan ko‘plab xatlar olmoqda”, — deb yozgan Aliya Nazarboyeva Instagram’da.
U so‘nggi fojiali voqealarni qabul qilish qiyin ekanini aytib, tinchlik davrida odamlarning bu tarzdagi o‘limini noto‘g‘ri deb bilishini qo‘shimcha qilgan.
“Jabrlanganlar va qurbonlar tufayli his qilinadigan og‘riq va afsuslarni so‘z bilan ifodalashning iloji yo‘q. Men barcha qurbonlarning oila a’zolariga samimiy hamdardlik bildiraman. Barchamiz uchun bu ayanchli saboq tariximizda so‘nggisi bo‘lib qolsin”, — deb yozadi u.
Qozog‘istonda yanvar boshida kuzatilgan ommaviy norozilik va tartibsizliklar davrida mamlakat prezidenti Qosim-Jo‘mart To‘qayev Nazarboyevning o‘rniga Xavfsizlik kengashiga rahbarlik qilishni boshladi. Qonunga ko‘ra, Nazarboyev umrining oxirigacha mazkur lavozim vakolatlariga ega edi. OAVda birinchi prezident oilasi bilan xorijga jo‘nab ketgani, uning jiyani, Qozog‘iston Milliy xavfsizlik qo‘mitasi raisining birinchi o‘rinbosari Samat Abish hibsga olingani haqida xabarlar tarqaldi.
Keyinroq millat yetakchisining matbuot kotibi Aydos Ukibay Nazarboyev Nur-Sultonda ekani, To‘qayev bilan muntazam aloqada bo‘lib turgani va Xavfsizlik kengashi rahbari lavozimini o‘z ixtiyori bilan topshirgani haqida bayonot berdi. 12-yanvar kuni Qozog‘istonning Bokudagi elchisi Serjan Abdikarimov ham Nazarboyev poytaxtda ekanini ma’lum qildi.
Avvalroq Nazarboyevning to‘ng‘ich qizi, senatning sobiq raisi Darig‘a koronavirusga chalingani haqida xabar berilgandi.
Izoh (0)