Xitoyda bachadon bilan jihozlangan odamsimon robot ishlab chiqilmoqda. U inson homilasini ko‘tarish, katta qilish va tug‘ish imkoniyatiga ega bo‘ladi. Bu haqda Janubiy Koreyaning Chosun Ilbo nashri xabar berdi.
“Homilador robot” loyihasi ustida Singapurning Nanyang texnologiyalar universiteti olimi Chjan Sifen ishlamoqda. Uning so‘zlariga ko‘ra, bu oddiy inkubator emas, balki qorin bo‘shlig‘iga joylashtirilgan sun’iy bachadonga ega gumanoid bo‘ladi. U farzand dunyoga kelishida zarur bo‘lgan barcha jarayonni — urug‘lanishdan tortib tug‘ruqqacha takrorlay oladi. Homila robot bachadonidagi amniotik suyuqlik ichida rivojlanadi, oziq-ovqat esa maxsus naycha orqali yetkaziladi.
Sun’iy bachadon hayvonlar ustida o‘tkazilgan tajribalarda ijobiy natija bergan. International Nature Communications jurnalida keltirilishicha, 2017-yilda Filadelfiya bolalar shifoxonasi olimlari 23 haftalik inson homilasiga teng bo‘lgan, ammo muddatidan oldin tug‘ilgan qo‘zichoqni “biobag” deb atalgan sun’iy bachadonda rivojlantirilgan. Shaffof vinildan tayyorlangan biobag ichiga iliq suv va tuz qo‘shilib, sun’iy amniotik suyuqlik hosil qilingan, qo‘zichoq esa kindik orqali oziqlantirilgan. Oradan to‘rt hafta o‘tgach, jonivor yaxshi rivojlana boshlagan.
“Sun’iy bachadon texnologiyasi allaqachon yakuniy bosqichda. Endi uni robotning qorin bo‘shlig‘iga joylashtirish va odam bilan robot o‘rtasida homiladorlikni ta’minlaydigan o‘zaro bog‘lanish mexanizmini yaratish kerak”, deydi Sifen.
Ammo u embrionni sun’iy bachadonga joylashtirish qanday amalga oshirilishi haqida batafsil ma’lumot bermadi.
Dastlabki “homilador robot” prototipi 2026-yilda ishlab chiqilishi kutilmoqda. Uning narxi 100 ming yuan (taxminan 14 ming AQSh dollari) bo‘lishi mumkin.
Daily Mail’ning yozishicha, bachadonli robot yaratilishi haqidagi xabar Xitoy ijtimoiy tarmoqlarida keng muhokamalarga sabab bo‘ldi. Ayrim foydalanuvchilar bolaning ona bilan bachadon davridagi bog‘lanishidan mahrum bo‘lishini “axloq va odob me’yorlaridan yiroq, shafqatsiz” deb baholadi. Boshqalar esa bu g‘oyani qo‘llab-quvvatlamoqda.
Izoh (0)