Germaniya Ichki ishlar vazirligi rahbari Nensi Fezer mamlakatda Telegram messenjeri bloklanishi mumkinligi haqida ogohlantirdi. Bu haqda Reuters xabar berdi.
Germaniya IIV rahbarining aytishicha, agar kompaniya mamlakat qonunchiligini mensimaslikda davom etsa, ushbu chorani qo‘llashga to‘g‘ri keladi. Xususan, gap Telegram platformasidagi ekstremistik bayonotlar, koronavirusga qarshi emlanish va karantinni boykot qilishga chaqiruvlar haqida ketmoqda.
“Biz huquqiy davlatmiz, lekin prinsipial jihatdan bunday imkoniyatni inkor eta olmaymiz. O‘chirish juda og‘ir oqibatlarga olib keladi va, albatta, so‘nggi chora bo‘ladi. Undan oldin qolgan barcha variantlardan foydalanib bo‘linishi kerak”, — dedi Fezer.
Uning so‘zlariga ko‘ra, Germaniya Yevropa Ittifoqidagi hamkorlari bilan Telegram’ni qanday tartibga solishni muhokama qilmoqda.
“Telegram’ning bazasi bugun Dubayda, ertaga u ehtimol, Kayman orollarida joylashgan bo‘lishi mumkin. Huquqiy jihatdan tartibga solish uchun bizga katta kuch kerak bo‘ladi. Germaniya bu ishni yolg‘iz hal qila olmaydi”, — dedi u.
Biroq Germaniya IIV vakili Telegram’ni amalda qanday qilib bloklash mumkinligi haqidagi savolga javoban hech qanday texnik yoki huquqiy tafsilot bermagan.
Mavzuga doir:
- “Roskomnadzor” Google, Apple, Telegram va Meta’dan Rossiyada vakolatxona ochishni talab qildi. Aks holda bu servislar bloklanadi
- AQShda 20-sentabrdan boshlab TikTok va WeChat dasturlarini yuklab olish taqiqlanadi
- Pavel Durov Telegram bloklanishi sababli rossiyaliklarning hayoti yomonlashishini aytdi
- Eron prezidenti: Telegram’ning bloklanishi sud organlarining “buyurtma qaroridir”
Izoh (0)