Buyuk Britaniya bosh vaziri Boris Jonson 2020-yil may oyida Londonda Dauning-stritdagi bosh vazir qarorgohining bog‘ida o‘tkazilgan ziyofatda qatnashganini tasdiqladi. O‘sha paytda mamlakatda koronavirus tufayli birinchi umummilliy lokdaun amal qilayotgandi, deb yozadi BBC News.
Jamoatlar palatasida nutq so‘zlagan Jonson o‘sha paytda lokdaun ostida bo‘lgan odamlardan uzr so‘radi:
“Men uzr so‘ramoqchiman. Butun mamlakat bo‘ylab millionlab odamlar o‘tgan 18 oy ichida aqlbovar qilmaydigan qurbonlik qilganini bilaman. Ular nimalarni boshdan kechirganini tushunaman: odamlar yaqinlarini dafn qila olmadi, o‘zlari istagandek yashay olmadi, sevgan ishlari bilan shug‘ullana olmadi. Ular mendan va men rahbarlik qilayotgan hukumatdan qanchalik g‘azablanishini bilaman, chunki odamlar koronavirus qoidalarini ishlab chiqqanlarning o‘zi Dauning-stritda ularga rioya qilmayapti, degan fikrda”, — dedi Jonson.
Britaniya bosh vazirining aytishicha, 2020-yil 20-may kuni ziyofat bo‘lib o‘tayotganda u o‘z qarorgohi bog‘iga chiqib, xodimlarga minnatdorlik bildirgan, 25 daqiqadan so‘ng kabinetiga qaytib, ishlashda davom etgan. Jonson buni ishga oid tadbir deb o‘ylaganini aytdi. Hozir uning fikricha, o‘shanda ziyofatni to‘xtatishi kerak edi.
Leyboristlar partiyasi yetakchisi Key Starmer Boris Jonsondan o‘zining “behuda” bahonalari va “kulgili” yolg‘onlari tufayli iste’foga chiqishni talab qildi.
2020-yil may oyida Dauning-stritda ziyofat uyushtirilgani haqida birinchi marta 2022-yilning yanvar oyida ommaga ma’lum bo‘lgandi. ITV va BBC News ma’lumotlariga ko‘ra, bosh vazir qarorgohidagi ziyofatga 100 ga yaqin odam taklif qilingan, biroq bor-yo‘g‘i 30 kishi, jumladan, Boris Jonson ham kelgan.
2021-yil dekabr oyida Britaniya hukumatida bosh vazir idorasining a’zolari Dauning-stritda uyushtirilgan ziyofatni izohlash to‘g‘risidagi hazili aks etgan video tufayli mojaro chiqdi. Boris Jonson video uchun uzr so‘ragan va ichki tekshiruv o‘tkazishni buyurgan. Videoga tushgan Jonson ofisining xodimi Allegra Stratton iste’foga chiqqan.
Izoh (0)